Panghasi sa MCIAA

Inay bakwion ang P500,000 nilang pabawon ngadtong Dawnie Roa, o mangayo og pasaylo sa pagwaldas sa hinagoan sa mga magbubuhis, o moboluntaryo pagtugyan sa ilang mga dokumento ngadto sa Visayas Ombudsman, ang kadagkoan sa MCIAA nilusad na hinuon og imbestigasyon pag-ila sa kawani o mga kawani nga nibisto sa makauuwaw nga transaksiyon ngadto sa mga sakop sa media.

Gisukitsukit sa mga imbestigador sa MCIAA ang gidudahan nga mga kawani. Namasin tingali nga may mokumpisal, o mapandol man lang sa pagtubag sa mga pangutana. Ug may kapahimungtan na sa wa damha nga pagka apiki nga ilang nahiagoman. Sa laktod, nagsugod na ang pagpanghasi ug pagpanggukod sa MCIAA.

* * *

Apan, sama sa naandan, sipyat ang kadagkoan sa MCIAA sa kaubos sa ilang pagtan-aw sa mga kawani ug sa mga magbubuhis. Nagtuo ba nga motak-om na ang mga kawani mahitungod sa uban pa nilang mga tinagoan tungod lang sa pagpanghudlat? Nagpaabot ba nga molingiw lang gihapon ang mga magbubuhis kun tabonan lang gihapon inay ipasabot ang mga binuang nga gipasangil batok sa MCIAA?

Inihap na lang ang malipayong mga adlaw sa kadagkoan sa MCIAA. Mao nga gititi ang nahibilin nga pila na lang ka adlaw paghingpit sa ilang pagpahimus sa gahom ug paglutos sa tanang nangahas pagbaraw nila. Sa di pa moabot ang di na kapugngan nga adlaw sa panudya.

* * *

Unsa may kalapasan nga nahimo sa mga kawani sa MCIAA? Kana kun gikan nila ang kasayuran ni Rene Borromeo sa The FREEMAN nga maoy naka-scoop sa eskandalo? Mameligro ba diay ang nasudnong seguridad kun nitabi sa ilang nahibaw-an sa maniobra sa mga sakop sa board?

Gawas pa, legal man kaha ang transaksiyon? Gipaubos man kaha sa makuti nga deliberasyon? Gikonsulta man kaha ang mga eksperto sa balaod? Nganong wa man dayon itug-an ngadto sa mga magbubuhis, nga maoy tinuod nga tag-iya sa kuwarta nga ilang giwaldas? Nganong diha na man angkona nga uwahi nang tanan kay nahatag nang tseke ni Roa?

* * *

Mahimo bang hatagan nang Pres. Noynoy Aquino og kinutoban ang nangalisbo nga salida sa MCIAA? Mahimo bang kumbinsihon na niya silang General Manager Danilo Francia ug ubang kadagkoan sa MCIAA nga di sila maoy tinuod nga "boss" kun dili ang katawhang Pilipinhon? Mahimo bang palagputon na niya sila aron kapulihan og mas ligdong ug mas takos nga mga tagduma sa labing daling panahon?

Ngadto sa tarung ug buotan nga mga kawani sa MCIAA, nga gidaugdaog sud na sa daghang katuigan ug nabalaka nga mahimo nga makulban na sila sa kaldero ning labing uwahi nga pagpangabuso, palihug tuohi ang pasalig sa mga nag-una nato nga ang labing ngitngit ug ataon nga bahin sa kagabhion mohakop sa dayong busilak sa banagbanag.

* * *

Email:[email protected]