Priority ni Rep. Osmeña: Kadalanan sa mga mountain barangays

Hatagan sa unang pagtagad ni Rep. Tom Osmeña ang kadalanan sa mga mountain barangay sa south district ning dakbayan. Kini ang among nasayran, kauban ni Dodong Casinillo, OSCA Head sa among pag-courtesy call sa bag-ong Kongresista sa south district.

Mitaho usab si Casinillo sa iyang mga laraw ug mga kalihokan sa senior citizens sa nagkalainlaing barangay chapter, specifically sa mga mountain barangays … alang sa kasayoran ni Rep. Osmeña

Matud ni Osmeña, ang kadalanan mahinungdanon kaayo alang sa mga molupyo sa barangay, aron nga dili sila ma-isolated gikan sa ubang mga barangay sa patag ug aron ma-accessible sila sa isig ka-barangay.

Lagyo kaayo ang mga mountain barangay, ug maoy tinguha nga madugtong sila sa isig-usa pinaagi sa halapad, lig-on, ug dili putol-putol nga kadalanan. Pananglitan, mahimo nga ang dalan sa Sinsin ilahos ngadto sa transcentral highway. Ingonman ang barangay nga duol sa highway.

Kun matuman kining maong mga laraw, atong makita nga mag-gabas-gabas na unya ang mga sakyanan sa maong mga barangay, ug dili na maglisud ang mga mag-uuma pagdala sa ilang mga abot nganhi sa city proper. 

Sa ato pa, kun maghisgot tag legislative agenda ni Osmeña, nag-una sa iyang concern mao ang mga mountain barangay sa iyang distrito. Usahay god, mao may atong madunggan ang mga pagmahay sa mga molupyo sa kabukiran nga in most cases, last priority sila kun kaugmaran ang hisgutan.

Sa among pagduaw sa mga mountain barangay, kauban ni Dodong Casinillo, among nakita ang dakung panginahanglan sa kaugmaran sa mga barangay. Nagkinahanglan og tukmang atensyon sa mga namunoan sa siyudad.

Dili ikalalis ang dakung mahimo sa kadalanan sa kaugmaran sa usa ka dapit. Mao nga kining mga tinguha ni Kongresista Osmeña pagtukod og kadalanan sa mga mountain barangay makahatag og kahigayonan pagpalambo sa hingtungdang mga barangay. Mosunod dayon ang ubang economic activity sulod sa mga barangay, ug makaikag sa mga dagkung magpapatigayon ug dili na sila magpanuko pagbubo og capital sa kabukiran.

In fairness, hinuon, daghan sad kaayong mga mountain barangay nga maayong pagka-develop, aktibo ang ekonomiya, adunay mga dagkung barangay hall ug mga multi-purpose complex. Daghan na kanila ang adunay mga computer ug ubang mga bag-ong gamit pang-opisina. Ug labaw sa tanan, ang mga dagkung truck nga gihatag kanila sa dakbayan nakahatag kanila’g kasayon sa ilang mobility.

Busa, kining tanan nagpasabot nga wala sila pasagdi sa city government. Hinuon, daghan pang kuwang. Ug kining kadalanan nga tukoron ni Kongresista Osmeña daku kaayo’g epekto sa kaugmaran sa mga mountain barangay sa south district.