Bisan ang mismong grupo nga nikampanya alang ni Presidente Benigno “Noynoy” Aquino III dinhi sa Sugbo sa miaging eleksiyon tungod kay puno sila sa pagsalig nga siya maoy gipaabot nga makausab sa sistema sa atong politika hinay-hinay na nga nahinaway sa gihimo ni P.Noy.
Pipila sa mga membro sa Tuloy Pinoy mitug-an nga nasagmuyo sila sa pipila ka mga opisyal nga gitudlo ni P.Noy og pwesto sa gobyerno. Partikular nga wala nila mauyoni mao ang pagtudlo kang Angelito Alvarez isip commissioner sa Bureau of Customs ug sa protégé ni Senador Panfilo Lacson nga si Magtanggol Gatdula isip director sa National Bureau of Investigation.
Nagkanayon ang pipila ka membro sa Tuloy Pinoy nga wala nila masabti nganong taliwa sa kampanya ni P.Noy alang sa bag-ong gobyerno, gobyernbo nga limpiyo gikan sa karaang pamaagi ug sa korupsiyon, gitudlo man hinuon niini si Alvarez ug Gatdula.
Si Alvarez wala lang maila nga konektado sa Lina group of companies nga dako kaayo og stake sa Bureau of Customs, kwestiyonable pa gyud ang kridibilidad niini. Gani sa pagtumaw pa lang sa iyang ngalan nga mamahimong commissioner sa customs giuwan na dayon siya og kontrobersiya.
Usa na niini mao ang iyang gikatahong pagpanikas sa usa ka golf tournament. Gani gisuspenso siya sa iyang golf club tungod kay nanikas sa resulta sa Mango Tee.
Dili ko kasabot nganong ang usa ka tawo nga napasanginlang nanikas gitudlo man hinuon sa pwesto. Kun sa torniyo sa golf nakaako siya sa pagpanikas, unsa may dag-anan sa mga magbubuhis kun iyang tikason ang buhis nga alang unta sa gobyerno?
Si Gatdula, gitudlong director sa NBI, unsa may mahitabo sa kaso batok ni Lacson? Ang luoy mao ang mga saksi nga naa sa custody sa NBI. Mosalig pa kaha sila sa ilang seguridad sa NBI kun ang hepe sa maong ahensiya bata-bata ni Lacson nga ilang gipasanginlang lakip sa responsabli pagpatay sa publicist nga Salvador “Bubby” Dacer ug sa driver niini nga si Manuel Corbito?
Kun sa pagpili palang sa mamahimong opisyal niyang pamilya daghan na og palpak si P.Noy unsa na kaha ang paghimo sa labing mahinungdanon nga mga desisyon alang sa atong nasud.
* * *
Gibakwi na ni Mayor Michael Rama ang iyang “gag order” ngadto sa mga department heads sa City Hall. Kini human siya makasugat og grabe nga pagsaway gikan sa media ug bisan mismo ni arsobispo Ricardo Cardinal Vidal.
Salamat sinsitibo si Rama sa mga pagsaway. Hinaut nga ang maong hitabo magsilbi ning leksiyon alang niya nga dili magpataka og buka sa iyang baba.
Hinaut usab nga ang maong hitabo mamahimo niyang rason aron inay nga ang mga department heads maoy iyang i-gag, ang iyang kaugalingon maoy iyang i-gag tungod kay sa pagkatinuod lang, isip sakop sa media mas ganahan pa ko nga mo-interview sa mga department heads kay sa niya.
Gawas nga mas direkta ang tubag nga imong madawat, sigurado ka pa nga barugan niini ang ilang gisulti bisan pa og maapeki.
* * *
Email: fplanguido@yahoo.com.