Tikasan sa customs

Usa ko sa misaad pagsuporta sa administrasyon ni Pres. Benigno Simeon Aquino III bisan wala makadaog akong manok nga si Sen. Mar Roxas, akong idol sa good governance.

Pero nagsugod na ko pagkahibulong nganong dunay nakasulod nga mga “shady characters” sa iyang kabinete nga unta saad man niya sa eleksiyon nga puohon ang mga tikasan sa gobyerno ug undangon ang kalisod pinaagi sa pagwagtang sa korupsiyon.

Walay lalis sa iyang pagsalig nga iyang gibutang sa mga personalidad nga iyang gipili ug gitudlo ngadto sa nagkadaiyang departamento.

Apan ang labing kontrobersiyal nga tinudlo ni Pres. Pnoy mao ang negosyanteng si Angelito Alvarez aron mamuno sa ahensiya nga manggukod og mga smugglers, ang Bureau of Customs.

Walay puas ang pagsaway kang Alvarez hangtod karon ug nagsugod kini sa giingong pagpanikas niya sa Mango Tee 2010 golf tournament sa Alabang Country Club.

Niadtong wala pay klaro si Pres. Pnoy kun itudlo ba si Alvarez, wala manggawas ang mga pagsaway. Karon nga si Alvarez na gyuy commissioner sa customs, nanaghan ang iyang mga kritiko ug miapil na niini ang mga supporter ni Pres. Pnoy nga mao ang Tuloy Pinoy.

Dinhi sa Sugbo, usa sa nangulo niining Tuloy Pinoy mao ang kanhi mayor sa Badian nga si Dr. Boy Lucero.

Apan ang bokal kaayong misaway kang Alvarez mao ang Tuloy Pinoy sa Negros Occidental. Ug wala mag-inusara ang Tuloy Pinoy kay si Senador Tito Sotto maisugon kaayong mikuwestiyon sa appointment ni Alvarez.

Ang ilang punto nganong si Alvarez man ang itudlo pagka-commissioner sa customs nga aduna man kini rekord sa pagpanikas sa golf competition.

Kini golf man gud usa kini ka duwa sa mga matinud-anon, walay luna ang mga tikasan. Mao bitaw kini hinungdan nga human masakpi si Alvarez nga nanikas sa Mango Tee 2010, sumala sa report gi-ban kini sa ubang golf club ug dili na makaapil og mga golf tournament.

Sa dihang giinterbiyu kini usa ka buntag sa GMA-7 kun nagdulaan pa ba kini og golf, si Alvarez mitubag “badminton” na lang iyang duwa.

Ang mga dapig ni Alvarez nakaingon nga gamay ra kaayo ang pagpanikas ni Alvarez sa golf tournament nga himuong isyu pag-withdraw sa appointment ni Alvarez sa customs.

Bitaw, gamay ra kaayo kay dili man related ang isyu sa pagpanikas sa sports ug ang pagdumala og usa ka ahensiya sa gobyerno.

Apan dili ba kining customs mao ang ahensiya nga gitahasan paggukod sa mga smugglers ug sa pagkolekta og revenue aron ibubo sa kaban sa gobyerno? Kun tikasan ang commissioner sa customs, makaseguro kaha kita nga dili siya manikas sa koleksiyon sa duties and taxes?

Kini ra ba si Alvarez chairman kini sa Philippine Basketball Association (PBA) sa wala pa itudlo pagka-commissioner sa customs.

Gikan hinuon siya sa Sycip Gorres Velayo accounting firm kauban ang kalihim sa Department of Finance nga si Cesar Purisima.

Usa pa gyud, si Alvarez ang nangulo sa mga kompaniya sa Lina Group sama sa Airfreight 21000 (Air21) ug Federal Express (FedEx). Gitawag kini og Lina Group kay iya man kini ni kanhi Customs Commissioner Alberto Lina.

Gawas sa isyu sa iyang katikasan, mitumaw usab karon ang pangutana kun wala bay conflict of interest ang iyang pagdumala sa customs nga ang Air21 ug FedEx negosyo man kini nga maglambigit og transaksiyon sa customs.

Ang Tuloy Pinoy group miingon nga nakaabot na ni Pres. Pnoy ang ilang pagkuwestiyon sa appointment ni Alvarez.

* * *

Balita kagahapon sa The Freeman (nga nagsaulong sa ika-91 nga kasumaran sa pagkatukod), igsuong pamantalaan ning Banat News, nga ang siyudad nagtinguha sa paglimpyo sa kadalanan batok sa mga sidewalk dwellers.

Maayong seryosohon kini sa Cebu City Hall kay hilabihan na kadaghan sa mga pamilya nga anaa na manimuyo daplin sa kadalanan.

Dugay na kining problemaha, apan nahibulong ko nganong karon lang maninguha ang siyudad niini.

Hinuon duna may giingon sa pinulongang Español nga “mas vale tarde que nunca” nga sa ato pa, bahala na og ulahi na, kay sa wala gyud. Bahala na og karon lang ang aksiyon sa kagamhanan sa siyudad alang niining mga pamilya sa kadalanan kay sa wala gyuy aksiyon, dili ba?

Makaluluoy kaayo tan-awon ang maong mga pamilya, ilabi na kadtong adunay mga masuso nga bisan sa kainit ug katugnaw, anaa ra manghigda sa sidewalk, anha maglung-ag, anha magsalo’g pangaon, anha mangaligo, anha mo-oo, ug halos tanan anha lang sa sidewalk.

Dili baya maayong tamayon kining mga pamilyaha, kay sahi ra og kitay nahimutang sa ilang dapit ug kitay walay balay ug kitay nagkalisod.

Apan dili sila angay rombohon kay dili nato mapugos sila kun wala na gyud silay mahimo sa ilang pagka-pordoy. Dinhi unta niining gutloa mosulod ang gobyerno aron pagluwas kanila.

Apan unsaon man nga wala man mapatas ang pagkatag sa ‘wealth’ sa atong inahang Pilipinas. Ang mga adunahan misamot ka-adunahan ug kitang mga pordoy misamot og ka-pordoy.

Kini tungod kay sa panahon sa pagpanday sa mga polisiya sa gobyerno –- nasyonal o lokal –- kanunay intawon nahikalimtan ang mga pordoy.

Kun tinud-on sa pamunoan ni Mayor Michael Rama ang paghatag kanila og desenteng luna asa sila makapuyo, hasta ko makahilak sa kalipay nga sa katapusan, gilingi na gyud sila sa kagamhanan sa siyudad.