EDITORYAL - Angayan bang basulon ang Pagasa?

Panahon na usab karon sa tingulan, sentro sa mga balita ang mga trahedya sa paglunop, landslides, mga danyos sa estraktura ug agrikultura ug ingon man kinabuhi.

Sa pagsulod sa bagyong Basyang niadtong milabay’ng semana nabwena-manohan dayon ang Philippine Atmospheric, Geophysical and Astronomical Services Administration og pagsaway kay sayop ang ilang forecast kon bana-bana sa direksyon sa bagyo.

Dali kaayo silang gibasol gumikan kay nagbunga kini og kadaot ug pagkakalas sa kinabuhi sa pipila ka mga tawo didto sa Luzon.

Unsa man diay ang forecast dili ba pagbana-bana? Mao ‘to ang gibuhat sa PAGASA, ilang gibana-bana ang direksyon ug ang bana-bana dili gyud accurate.

Nganong panahon sa ingon niining mga hitaboa kanunay man basulon ang PAGASA? Dili ba responsibilidad sa matag Pilipino ang pagmatngon ug pag-amping niining mga panahona?

Unsaon nalang diay kun walay PAGASA nga mobana-bana? Dili nalang gyud mangandam ang tawo sa katalagman? Dili baya sa tanang higayon nasipyat ang PAGASA.

Pipila ka mga higayong husto ang pagbana-bana sa PAGASA nga gibalewala gihapon sa mga tawo. Ebidensya niini ang mga nangalunod kaniadto nga mga barkong pasaheroan, panagatan, mga gipanghunlakan sa yuta ug gilunopang kabalayan.

Ang PAGASA kanunay’ng morason nga kulang sila sa pundo, modernong ekipo ug ilabi na sa komunikasyon. Ang gobiyerno kaniadto paman gipangayoan sa maong ahensya og kagamitan apan hangtud karon wala gihapon mahatag.

Hangtud nga dili mahatagan og husto ug modernong ekipo ang PAGASA magpadayon gihapon sila sa pagbana-bana base sa kung unsay nakita sa ilang kasamtangang ekipong karaan.

Angayan paman ganing dayegon ang PAGASA gumikan kay bisan sa kakaraan sa ilang mga gamit ug kanunay’ng pagsaway sa publiko ug sa mismong gobiyerno padayon gihapon sila sa pagserbisyo.