Bisan giisip nga double compensation ang P500 mil nga severance pay sa Mactan Cebu International Airport Authority (MCIA) alang kang kanhi Department of Tourism (DOT-7) regional director Patricia Roa, ang general manager sa airport ug si Roa mismo padayon nagmagahi pag-uli sa maong kantidad.
Ang Office of the Ombudsman-Visayas mimando na kang Roa sa pag-uli sa maong kantidad ngadto sa MCIAA. Apan walay balita kun aduna bay positibong aksiyon si Roa niini.
Si kanhi MCIAA general manager Alfonso Alerre mihulagway usab sa maong severance pay ni Roa nga 'double compensation' tungod kay si Roa nakadawat na og retirement pay isip retiradong opisyal sa DOT.
Samtang si retired general Danilo Francia, general manager sa MCIAA, wala pa gyud makahatag og 'legal basis' sa hunta direktiba sa paghatag sa maong dakong kantidad alang kang Roa.
Kun gukdon si Roa sa Ombudsman, nasayod tingale kini nga molanat pa og pipila ka tuig una maresolbar. Busa bisan pa kun mahimong 'final' ang kamandoan pagpauli sa P500 mil ngadto sa kaban sa MCIAA, tigulang na kaayo si Roa.
Apan kun adunay kaulaw si Roa, angayan niyang i-uli ang maong kantidad ngadto sa MCIAA - walay kapin, walay kulang. Ilabi na nga ang opinyon sa kadaghanan wala mopabor sa pagpagawas sa maong kantidad isip iyang severance pay.
Dili angayang isakripisyo ni Roa ang iyang pagka-ilado nga maayong opisyal sa gobyerno sa dihang aktibo pa siya sa serbisyo ug nalambigit sa kampanya pagpakusog sa turismo sa tungatungang Kabisay-an pinaagi lang sa kantidad nga P500 mil.