Ayaw pag-inarogante uy!

Ingon sa walay gana si Mayor Michael Rama nga idayon ang pagsubasta sa mga ospital ug tunghaan kang kansang mga tag-iya wala gayud mobayad og buhis sa dakbayan.

Matud ni Rama nga kun moinsister gayud ang city treasurer nga si Ofelia Oliva sa pagsubasta sa maong mga tunghaan ug ospital kinahanglan sila nga magmatngon.

Gipasabot ni Rama nga kun dunay mokiha sa dakbayan sa maong lakang sa city treasurer, adto kini mobanda kaniya isip mayor.

Klaro kaayo nga lahi og baruganan si Rama kay ni kanhi mayor Tomas Osmeña.

Apan angay’ng mopadayag si Rama sa iyang baruganan kun unsay pagsabot niya sa balaud.

Motoo ba siya sa pangangkon sa mga tag-iya og tunghaan ug ospital nga ang ilang institusyon “non-profit” o kaha paboran ba niya ang baruganan ni Osmeña nga ang maong mga tunghaan ug ospital angay gayud nga mobayad og buhis.

Kun ako ang pasultihon, makaingon ko nga suportahan nako ang baruganan ni Tommy. Dili ka na makabasta-basta karon sa pagpatambal diha sa mga pribadong ospital.

Ang akong kauban lang mitug-an nako nga dili ka na dawaton sa Cebu Doctors Hospital kun magpa-admit ka unya wala kay deposito nga P10,000.

Mao kana ang nakapait diha. Moingon kamo nga dili non-profit ang inyong mga ospital nga dili man gani kini modawat og mga pasyente kun walay deposit. Porbida.

Kun ari ka usab sa tunghaan, dili ka makabasta-basta kay mahal kaayo karon ang bayad sa matrikula. Arang-arang na lang sa CIT University kay duna sila’y scholarship.

Ang labing maayo tingali nga buhaton ni Rama nga dayonon nato nga isubasta ang maong mga ospital ug tunghaan ug bahala na sila nga mohimo’g legal remedy.

* * *

Awhagon diay nako kining regional director sa Land Transportation Franchising and Regulatory Board (LTFRB)-7 nga si Benjamin Go nga minus-minusan unta niya ang iyang pagka-arogante manubag. Isip kawani sa kagamhanan kang kansang sweldo gikan sa buhis sa katawhan, dili siya angay’ng maghinambugero pagpanubag.

Nanawag ko kaniya kaniadtong miaging semana kay nagpakisayod sa resulta sa gihimong road worthiness test sa mga sakyanan nga iya ni Dulce Gantuangco.

Wala malilong nako nga ang Motor Vehicle Inspection Center dili kini ubos sa LTFRB, kay direkta man kini nga ubos sa pagsuperbisar sa Land Transportation Office.

Imbis unta motubag og tarong kun dili siya ganahan nga motubag, sa arogante kaayo nga sinultihan, miingon man hinoon nga dili siya “yaya” ni Gantuangco.

Dili siya yaya ni Gantuangko nga magsunod kun gituman ba ang mando kaniya nga isumiter og road worthiness test ang iyang mga sakyanan. Nakalitan ko arogante kaayo ang maong sinultihan. Kun dili ka ganahan nga motubag, ingna nga dili ka gusto nga motubag kay ang MVIC dili ubos sa iyang pagdumala.

Ang imong batasan Sir pareho g’yud niadtong kaila nako nga military drop-out. Gitug-anan nako ang imong mga sakop diha sa LTFRB-7 regional office ug abi nako’g molaban sila nimo, gilibak ka hinoon.

Kun may plano ka pa gani Mr. Go nga motrabaho pa sa kagamhanan, ayaw pagbaton og batasan nga garboso. Hilas-hilas ka lang. Ako pa nimo Mr. Go himoan nimo’g aksyon kanang daghan kaayo nga mga PUJ ug taksi nga gihatagan sa LTFRB og frangkisa bisan og walay mga grahe ug anaa ra mag-parking sa karsada.