Tulis sa atubangan

Way mas haum nga termino paghulagway sa mga opisyal sa Mactan Cebu International Airport Authority Board gawas sa “baga og nawong” tungod sa ilang kapamahimuslanon sa gahum.

Way kalainan sa pagpanulis sa katawhan ang ilang gihimo nga paghatag og dakong kantidad ngadto sa miretiro na nga regional director sa Department of Tourism, Patria Aurora, isip “severance pay.”

Ambot unsay ilang ipasabot niini, apan alang sa mga yano nga mga tawo, ang epekto niini way kalainan sa retirement pay. Ang MCIAA Board nga gilangkuban sa 11 ka mga tawo lakip na sa chairman ug vice chairman niini maoy nagbuot nga hatagan si Roa og P500 mil isip benepisyo sa pipila ka tuig niya nga paglingkod isip usa sa siyam ka mga membro sa board.

Ang general manager sa MCIAA nga si Augusto Francia nanalipod sa ilang paghatag sa maong benepisyo kang Roa. Gani si Francia pa maoy giingong mimando nga ipadali ang pagproseso sa tseke.

Dihang nasayran sa Ombudsman ang nag-ung-ong nga pag-release sa tseke mimando si assistant ombudsman Virginia Palanca Santiago nga dili ihinayon ang pag-release niini hangtud nga mahuman ang ilang imbistigasyon. Apan inay nga sundon ang mando sa Ombudsman gibaliwala sa mga opisyal sa tugpahanan. Ang board secretary pa mismo nga si Evelyn Ramirez maoy mikuha sa tseke ug mi-deliver niini ngadto sa pinuy-anan ni Roa. Dili ni dakong irigular nga i-deliver ang tseke, inay nga ang tag-iya maoy mokuha? Nagpakita ni sa pagka wa gyuy uwaw niining mga tawhana. Dili man dautan ang paghatag og benepisyo sa usa ka miretiro nga opisyal sa kagamhanan kun kini entitled sa maong benepisyo. Apan si Roa dakong kwestiyonable.

Una, dili siya empleyado sa tugpahanan, naglingkod lang siya isip membro sa board nga nagdawat og dagko kaayo nga honorarium matag buwan. Basi sa report P30 mil ang iyang gidawat nga honorarium matag buwan bugti sa pagtambong sa duha lang ka meeting.

Sa ato pa gibayran siya og P15 mil matag meeting nga molanat lang og duha ka oras labing taas. Ikaduha, duna siya’y retirement benefits sa Department of Tourism isip regional director.Busa ang paghatag niya og retirement benefit sa MCIAA maisip nga double compensation nga hugtanong gidili sa atong balaud.

Ikatulo, duna nay hukom ang Commission on Audit sa susamang kaso kaniadto diin gi-disallow ang paghatag sa MCIAA sa samang benepisyo ngadto sa meritiro nga membro sa board.

Gani ang mga sakop sa board gimanduan nga mo-refund sa ilang gibayad. Lakip gani sa gimanduan nga mo-refund mao si Roa mismo isip usa sa mga membro.

Unya karon modawat na hinuon siya og retirement pay nga illegal? Wa gyuy mapili ang mga sakop sa board, pulos gyud way uwaw, wa gyuy kaikog sa mga kawani nga ilang gipahilak pipila ka tuig na ang milabay pinaagi sa pagdumili paghatag sa ilang backpay nga mobalor og P125 milyones.

Kun wala ko masayop niadtong 2004 mihulga ang mga sakop sa MCIAA Employees Mutual Association nga magwelga tungod kay wala bayri ang ilang allowances nga naglakip sa hazard, meal ug medical coverage. Matud sa board kaniadto nga mag-agad kuno ni sa pagtugot sa ilang mga membro ug sa availability sa pundo. Ang paghatag sa allowance sa mga empleyado nga klarong nagserbisyo pahilakon una usa hatagan sa benepisyo nga angayan nilang madawat, pero kadtong dili empleyado ug kwestiyonable ba kun duna ba gyuy natampo sa pagdumala sa airport sayon kaayo nga gihatagan sa dakong kantidad, especial delivery pa ang tseke!!!!

* * *

[email protected]