Usa ka sakop sa laing Christian Denomination ang manggihatagong mibulig kanako diha sa mga proyekto sa parokya. Akong nakita nga lahi kaayo siya sa uban nga akong nailhan kay dili niya himuong babag ang relihiyon aron mahimong umolon ang panaghigalaay. Anaa kaniya ang usa ka hiyas sa ekumenismo. Dili sama sa mga lunod usahay patay nga katoliko nga naghinobra ang kakuti ug kasirado sa hunahuna.
Ang mga Judio ug mga Samaryanhon ang walay maayong kabubut-on sukad pa kaniadtong unang panahon mao nga usa ka dakong abnormalidad nga magduol gyud ang duha ka habig. Ang pari ug levita padulong sa templo ug dili sila buot nga makahikap og dugo nga makapahimo kanilang hugaw alang sa usa ka liturhiya sa templo. Dugang pa, kuyaw kadtong dalana nga nahimong strategic nga lugar sa mga tulisan. Apan ang Samaryanhon nihunong ug sa walay igong pangutana nialagad sa nagkinahanglan.
Daghan kanato ang dunay biases sa atong isigkaingon. Daghan kanato ang usahay nag-isip sa atong kaugalingon ingon nga mga elitists tungod sa relihiyon o dili ba tungod sa atong nahuptan nga posisyon. Sa parokya pananglitan, dili ikalimod nga daghan kaayong mga kuti-kutihan. Unya kun atong tan-awon wala diay nahimong tabang. Paet? Mao nga dili maayong mokumpiyansa sa mga makabitas dunggan nga katawa ug pahiyom sa mga tawong mausikon.
Alang kanako ning atong panahon karon, dili haom nga magpabilin kitang nahilansang sa atong pagka-Katoliko Sirado. Kay ang Diosnong Probidensiya gihatag man gani bisan sa mga tawong wala motuo kaniya dili ba?