Gipahibalo ni re-electionist Mayor Jonas Cortes sa dakbayan sa Mandaue ang pag-hire og unom ka mga consultant aron motabang kaniya pagpadagan sa Mandaue City Hall.
Duha sa mga tawo nga nahunahunaan ni Cortes nga kuhaon ang serbisyo mao silang kanhi Bokal Wenceslao “Weng” Gakit ug kanhi Cebu City Administrator Francisco “Bimbo” Fernandez.
Walay kuwestiyon ang pag-hire og mga tawo kun kining maong mga tawo mapuslan sa lokal nga kagamhanan sa Mandaue, ug kining mga tawhana makatampo alang sa kalambuan sa maong dakbayan.
Apan kun gikuha lamang sila aron pagpakusog sa “line-up” sa mga tawo sa mayor bisan kun kining mga tawhana dili mo-function sumala sa mandato nga ihatag kanila sa appointing authority, maayong dili na lamang kini dayonon sa pagtudlo isip mga consultant.
Dili lamang sa dakbayan sa Sugbo kun dili sa ubang mga lokal nga kagamhanan nga ang Commission on Audit nagreklamo sa kadagko sa mga suweldo, apan walay trabaho ang maong mga gipangsuweldohan nga mga consultant. Adunay mga naka-obserbar nga ang mga consultant mahimamat lang og balik sa nagtudlo kaniya kun mag-inom silang duha.
Si Cortes nagkanayon nga ang suweldo ni Gakit kuhaon gikan sa kaugalingon niyang bulsa. Mao kini ang bantayanan sa mga tawo kun asa mokuha og salapi si Cortes ihulip sa iyang isuweldo ni Gakit. Kun tinuod nga siyay mo-abaga sa suweldo ni Gakit, unsa ba diay kadato kini si Mayor Cortes sa Mandaue?
Ang pagtongkawo lang daan sa mga consultant sa city hall, bisan magtabitabi lang sa mga kawani ug mga opisyal dako na nga usik sa resources sa gobyerno, ilabi na kun mogamit og computer ug aircon.
Dili kuwestiyon ang pag-hire og consultant, ang kuwestiyon niini kun ang maong mga tawo nga kuhaon ni Cortes mahimong “sulsultant” nga maoy ka-intapan nga tigsulsol sa mayor.