Duna pa bay highway patrol?

Niining nagsunodsunod nga disgrasya sa mga highway, nakapangutana kos akong kaugalingon kun duna pa bay highway patrol. Kahinumdom ko sa CHPG kon Constabulary Highway Patrol Group, diin, ang mga driver sa dagkung kadalanan, sa mga highway, magmatngon gyud nga dili madakpan kay wa kadto silay pupasaylo. 

Gani, usa ako sa nadakpan, ug bisan og nagpaila ko nga Assistant Regional Director sa Department of Public Information, duna pa koy column sa Republic News, nagpakiluoy pa ko, gi-isyohan gyud kog TOP.

Unsa may akong violation? Dili over speeding, Dili reckless driving, dili driving without o expired license, dili overloading. Unsa man?

Nag-drive ko sa among depasahero nga Pinoy, kadtong gagmay nga PUJ mag-biyahian sa Urgello, kauban sa among pamilya, mga in-laws, kay mag-tree planting mi sa gamay namong yuta sa Tunghaan, Minglanilla.

Sa ato pa, tungod kay wa man ko mangayog permit, kay wa man sad ko mahibawo ning maong requirement, bisag diha ko nagtrabaho sa Information Department sa gobyerno, ang akong violation mao ang pagbiyahe gawas sa rota, bisan tuod og wa ko mamasahero. Ang rota, Urgello, unya miabot mis Minglanilla. Ambut ngano nga diha may highway patrol nga Domingo man unta to. 

Anyway, mao kadto ang highway patrol. Nakapangutana ko kun duna pa bay highway patrol kay kun duna pa, daghan untag mga disgrasya sa kadalanan ang kalikayan. 

Klaro kaayo nga ang mga driver sa mga buses, kasagaran nila mga abusado. Hinoon, dihay nakasakay kog Autobus paingon sa Hagnaya, naatlan lang tingali ko nga buotan ang driver, igoigo lang ang pagpadagan. O perhaps, disiplinado gyud tingali ang mga driver sa Autobus itandi sa uban sa laing mga bus companies.

Anyway, kun duna pay highway patrol, seguro gyud nga daghan ang madakpan gumikan sa overspeeding, reckless driving, overloading, ug sa dili paghatag og discount sa mga senior citizen. Ug kun regular ang presence o visibility sa highway patrol, mapugos ang mga driver pagtinarong.

Dihay usa ka higayon nga nabawo kog padaplin og maayo, diha na sa sidewalk tungod kay nakasugat kog kusog kaayong mi-overtake nga bus. Gani, mihunong gyud ko aron pagseguro nga dili ko mabanggaan.

Kini nga talan-awon, ordinaryo kaayo sa mga highway. Ordinaryo kaayo ang overspeeding ug overloading. Apan, wa kita makadungog nga dunay nadakpan gumikan sa maong traffic violation.

Ang pagpanakop himoon tapus sa aksidente, daghan una ang mangamatay, ug dili na masikop ang driver kay nalakip pagkamatay.

Atong makita dinhi nga ang atong gobyerno, suma sa atong nasinati, mao pay ilihok tapus sa usa ka dakung aksidente.

Akong balikon, daghan unta kaayong mga aksidente sa highway ang kalikayan kun duna pay mga highway patrol. Apan, lagmit duna pa. Ang nakadaot lang tingali kay unya na pod sila manakop kun dunay aksidente.

Mangutana sad ta : Mga brand new ba ning atong mga passenger buses? O mga reconditioned lang.