EDITORYAL - Pangindahay alang sa Compostela

Bisan human na ang eleksiyon, nagka-init ug nagka-init hinuon ang politika sa Compostela nunot sa kamandoan sa Commission on Elections-Manila pagsuspenso sa proklamasyon ni Mayor-elect Joel Quiño.

Sukad napakanaog ang kamandoan sa Comelec-Manila, ang kagubot sa balay-lungsod dili hitsura og usa ka malambuon ug malinawon nga lungsod.

Apan mapasalamaton hinuon ang mga ahensiya sa kagamhanan, lakip na ang Philippine National Police (PNP) nga malinawon na ang balay-lungsod nunot sa pagbuwag-buwag sa isi'g ka habig ug pagbiya sa lugar aron makapadayon sa inadlaw-adlaw'ng transaksiyon ang munisipyo.

Nakita na sa kadaghanan nga mas bugnaw ug linaw ang pagresolbar sa kasungian tali ni Quiño ug ni kanhi Mayor Ritchie Wagas kun walay supporters sa isi'g ka kampo nga motapok atubangan sa balay-lungsod.

Kay ang presensiya sa mga supporters ni Wagas ug Quiño maoy makapahaling og samot sa kagubot sa maong lungsod.

Karon nga si Department of Interior and Local Government (DILG-7) regional director Pedro Noval ang gitudlong "caretaker mayor" sa Compostela, angayan kining tahuron ug suportahan aron makadis-og sa unahan ang munisipalidad nga wala gyud makalihok sukad niadtong Mayo 10, 2010 nga eleksiyon.

Hapit na ang Hulyo 25 nga pista sa Compostela, tingale wala pa makatigum ang Fiesta Committee tungod sa kagubot. Hinaot nga ubos sa kasamtangang pamunoan ni Noval, dili maapektahan ang preparasyon sa maong kapistahan nga gipaabot nga makapahiusa sa mga lungsoranon sa maong lungsod.

Ang Comelec angayan usab moresolbar sa election case aron mabutangan na og mayor nga tinudlo gyud sa katawhan aron dili mapugngan ang mga kalambuan ug kaayuhan alang sa Compostela.