EDITORYAL - Pabadlong ug papansin ni Binay

Nagsugod na ang pagpabadlong ug pagpa-pansin ni Bise Presidente Jejomar Binay bisan pipila pa lang gani ka adlaw sukad nanumpa sa katungdanan silang Presidente Benigno Simeon Aquino III niadtong Hunyo 30 sa udto.

Ubos sa Konstitusyon, ang presidente lamang ang adunay official residence ug office, samtang walay nakabutang alang sa bise presidente.

Samtang naglakaw ang mga adlaw sukad pormal silang nakalingkod, si Binay mireklamo na tungod lagi kay wala siyay opisyal nga residensiya ug opisina. Hain naman diay ang pasiatab ni Binay nga mahimo siyang mag-opisina sa karaang munisipyo sa Makati?

Walay samang reklamo nga nadungog ang mga Pilipino ngadto ni kanhi Bise Presidente Noli de Castro, kinsa mapahiubsanon kaayong midawat sa unsa man nga gihatag isip prebilihiyo sa Office of the President sa pamunoan ni kanhi Presidente ug karon Rep. Gloria Macapagal-Arroyo.

Gikakurat usab sa mga tawo ang kalahian ni Aquino ug Binay. Samtang estriktong gisunod ni Aquino ang balaod trapiko ug mohunong gayod sa stop signal, ang convoy ni Binay wala motahod sa traffic lights ug mideretso-deretso kini sa pagdagan.

Kun kanunay siyang magpa-pansin ug magpabadlong, makaluluoy ang miboto kaniya kun magmahay nganong siya pa ang gipiling luyo-luyong presidente.

Ang iyang pagka-pating nga mitukar nang daan sa wala pa siya iproklamar nabantayan na sa mga tawo; nga kun dili kini niya undangon, magsilbe kining angkla nga maoy mopatighulog sa iyang politikanhong damgo ngadto sa kalaworan.

Kun moabot ang 2016 unya mosulbong ang popularidad ni Binay tungod sa iyang pabadlong ug pagpa-pansin, manguros na lang daan ang mga Pilipino kun buligan siya sa wala masayod sa iyang gipamuhat.