Ehemplo ni P.Noy
Wa ko mobotar ni Presidente Benigno “Noynoy” Aquino III sa miaging eleksiyon tungod kay nagtuo ko’ng dili siya maoy labing haum sa pwesto. Apan sa mga pasiuna niyang gihimo hinay-hinay nakong nakit-an nga posibleng nasayop ko sa akong pagtuo kaniya.
Bisan wala pa ko hingpit makumbinsir nga siya diay maoy posibleng tubag sa problema sa atong nasud apan abli na ko sa kamatuoran nga dako og ugma nga nagpaabot alang sa atong nasud kun magpadayon ang pagpakita ni Aquino sa bisan ginagmay nga ehemplo apan nagkulit og mas malungtarong epekto sa huna-huna ug kasing-kasing sa matag-usa ka nagpakabanang Pilipino.
Pananglitan ang pagbarog ni Aquino sa iyang mga pulong ug pagpuyo niini nga dili siya mogamit og “wang-wang” ug blinkers sa iyang mga byahe aron ipakita sa katawhan ang kausaban nga dugay na nilang gipaabot. Alang sa mga ordinaryo nga Pilipino ang ehemplo ni Aquino sa dili paggamit og “wang-wang” bisan sa kapeligroso alang sa iyang siguridad ug sa epekto niini sa iyang mga appointments usa ka butang nga dili malimtan sa publiko.
Kun molahutay si Aquino sa iyang mga maayong polisiya ug padayong mosunod niini pinaagi sa pagpakita sa ehemplo dili na kong matingala kun labaw kay sa iyang mga ginikanan mahalon ug panggaon siya sa mga Pilipino nga dugay nang uhaw sa kausaban ug sa mga maayong lider.
Ang gipakita ni Aquino nga ehemplo maoy kalidad sa usa ka maayong lider nga dugay na natong gipangita. Ang kalidad sa lider nga dili mahari-hari-on ug kamaong motuman sa iyang balaud. Kasagaran man gud sa lider, abusado ug nagtuo nga wa na sila’y apil sa silot nga gilatid sa atong mga balaud.
Usa lang ka butang ang kinahanglan pang pamatud-an ni Aquino ug kini mao ang iyang saad nga ubos sa iyang panggobiyerno wala nay kawat ug pangurakot. Nasayod kong dili niya mahurot og bantay ang tanang opisyal ug kawani sa gobiyerno, apan sayon rang mailhan kun matinud-anon ba siya sa iyang saad.
Kini pinaagi sa mga klase sa opisyal nga iyang gitudlo nga maglangkob sa iyang gabinite labi pa sa mga posisyon nga mahulagway nga maoy sagad gatasan sa mga kurakot. Angayang pilion niya og maayo ang mga tawo nga iyang itudlo sa maong mga pwesto, kadtong mga tawo nga way kaugalingon nga mga interest.
Pananglitan, gihugon-hugonan nga itudlo niya isip Commissioner sa Bureau of Customs si Guillermo Parayno. Dili ba dako kaayo og conflict of interest niini tungod kay ang mga patigayon ni Parayno naglambigit man sa aduana?
Dili man tingali bangkaruti ang Pilipinas og mga maayong laki nga mamahimong itudlo sa pwesto, kanang way business interest sa aduana. Nabalaka ko nga kun tinuod ang maong mga report kini lang maoy mamahimong mantas sa maayo na unta niyang nasugdan.
* * *
- Latest
- Trending
