Kutob ra sa hambog

Kita na lang mga pasahero ang angay magbantay aron dili mameligro ang atong kinabuhi sa mga gago ug mga danghag mga drayber ug operator sa mga public utility vehicles sama sa mga jeep ug mga bus de pasaheroan.

Kay ang ahensiya sa kagamhanan, ang Land Transportation Office, nga gitahasan sa pag-regulate kanila utro usab nga nagdanghag sa pagpatuman sa balaod.

Kapila na nato balikbalika dinhi sa Banat News nga ang LTO region 7 ubos sa pagdumala ni regional director Raul Aguilos walay direksiyon paglusad og operasyon sa kadalanan.

Hilabihan kaklaro sa mga violation sa mga bus ug minibus gikan sa habagatang Sugbo, apan kaming mga tig-agian sa south national highway mao ra gyuy makasinati sa pagka-gago sa mga drayber nianang mga sakyanan, samtang mga sakop sa Operations Section sa LTO-7 magpakitang-tawo lang sa ilang kakugi kun adunay disgrasya nga mahitabo.

Kun wala gani disgrasya, tua sa ilang mga lingkuranan nagpasinaw sa ilang lubot paghulat sa kaayuhan sa mga panguwarta nianang ahensiyaha.

Nakahinumdom kamo niadtong nahulog ang tourist bus sa JD Tours sa bung-aw sa Cansomoroy, Balamban? Human niadto, nagpa-init na usab si Aguilos ug si Aden Belsa sa Operations sa LTO-7 aron manakop.

Nawala og pipila ka adlaw.

Nakabuhi ang container sa trailer truck sa Poog, Toledo. Mibalik na usab silang Aguilos ug Belsa sa kadalanan.

Human niadto, wala na sila makit-i sa kadalanan.

Niadtong Sabado, midasmag ang Corominas bus sa usa ka konkretong koral sa Lutopan, Toledo. Pustaanay ta, mamalik na usab kini silang Aquilos ug Belsa sa karsada.

Pero akong pangutana, unsa man silang adlawa mag-operate? I-atol man usab nila ang operation sa mga adlaw nga dili kaayo sakay, sama sa mga adlaw’ng Martes ngadto sa Huwebes.

Mao nga dili sila makakita og violations sa mga bus ug minibus kay dili kaayo sakay kanang mga adlawa.

Nganong dili man sila mosulay og operate sa Lunes sa kaadlawon hangtod sa sayong buntag ug sa Biyernes sa hapon hangtod sa gabii?

Kining mga adlawa mosugmat ang violations sa mga bus ug minibus drivers. Sa Lunes sa kaadlawon ngadto sa sayong buntag, ang mga trabahante nga nanguli pagka-Biyernes ngadto sa Domingo ngadto sa ilang mga lungsod mamalik sa siyudad aron motambong sa trabaho ug eskuwela.

Samtang sa Biyernes sa hapon lahos na sa gabii manguli og balik sa mga lungsod ang mga estudyante ug mga trabahante.

Apan unsaon ta man nga tapulan man kining mga opisyal ug mga kawani sa LTO-7. Dili man makahatag sa ilang panahon nianang mga orasa ug mga adlawa nga akong gi-suggest kay sa Lunes sa kaadlawon, naghagok pa sila hastang lubot, ug sa Biyernes sa gabii, nanguli na sa ila o nangadto na sa SM o Ayala uban ang pamilya.

Pero kun sulayan nila og operate kining mga adlawa, makit-an nila ang tanang klaseng violations sa mga bus ug minibus.

Si Aguilos daan nang namalibad sa sugyot nga kadtong mga pasahero nga nanakay sa bus o minibus bisan puno na ug nakaingon sa overloading angay pakanaugon kun masakpan sa LTO operatives nga nanakay sa puno nang mga sakyanan. Rason ni Aguilos nga luoy ang mga pasahero kay ma-late sa trabaho kun pakanaugon kun masakpan ang bus o minibus nga nag-overloading. Apan asa man ang pilion ni Aguilos, ma-late ang maong mga pasahero sa ilang trabaho o sayo kaayo silang masulod sa menteryo ug sayo kaayong manuktok ni San Pedro sa langit o ni Satanas sa impiyerno?

Unya, maayong makonsensiya si Aguilos kay usa siya sa mapaninglan sa sayo nga kamatayon sa maong mga pasahero tungod sa kapakyas sa iyang buhatan pagbadlong sa gago nga mga drayber ug operator.

Samtang wala pay laing tubag sa mga aksidente sa kadalanan nga nanghitabo, maayong usbon na ni Aguilos ang direksiyon sa iyang buhatan.

Undanga usa nang operation sa mga helmet kay kun madisgrasya na sila, walay ulo sa pasahero nga mabuak gawas nila. Maayong unahon nila sa ilang operation ang mga badlongong PUVs.

I-matuod sa mga Cebuano nga wala kamo manguwarta sa mga operators pinaagi sa pagpakita sa inyong awtoridad ug paggukod kanila pinaagi sa pagpatubag kanila sa ilang responsibilidad ug layabilidad ngadto sa mga pasahero.

Hain naman to’ng panghambog ni Aguilos nga wala siyay pilion – bisan politiko o sakop sa media – sa pagpatuman sa balaod sa trapiko.

Karon nga nagpusot-pusot na ang disgrasya sa kadalanan, nakit-an na nga kutob ra diay siya sa hambog.

Molihok lang kun aduna nay disgrasya.

Manguros lang kun maigo na sa kilat.

Walay nabuhat sa iyang pagka-regional director sa LTO-7.

* * *

0915-7817491 o [email protected]