EDITORYAL - Pabadlong ni Binay

Kun tinud-anay ang laraw ni Vice President-elect Jejomar Binay sa iyang pagdagan niadtong Mayo 10 nga eleksiyon mao ang pagserbisyo sa katawhang Pilipino, modawat siya sa gitanyag ni President-elect Benigno Simeon Aquino III nga posisyon sa iyang kabinete ug dili siya angay magbuot.

Naklaro sa mga tawo ang pagpangluod ni Binay nga nagsumikad sa wala pagtuman sa iyang gusto nga mohupot sa Department of Interior and Local Government (DILG) tungod kay, matud sa mga kritiko niya, gamiton kini isip behikulo paingon sa iyang kinadak-ang damgo nga mag-presidente sa Pilipinas sa 2016.

Ang mga tigpaniid sa politika nagtuo nga usa sa mga factor sa iyang kadaogan (kun walay tikas) niadtong miaging presidential election, mao ang iyang pagpaduol sa mga local government units (LGU).

Mosamot hinuon siya og paduol kun siyay ilhong “hari” sa mga LGUs kun siyay makagunit sa DILG.

Kun serbisyo pa ang iyang laraw ug dili ang labing dako niyang damgo sa 2016, dawaton niya ang pagka-kalihim sa Department of Agrarian Reform, pagka-tsirman sa Housing and Development Coordinating Council ug Metro Manila Development Authority.

Mismo ang iyang runningmate niadtong milabay’ng eleksiyon nga si kanhi Pres. Joseph Estrada mitambag kaniya sa pagdawat og posisyon aron dili mahimong “NPA” (non-performing asset) sa administrasyon ni Aquino.

Kun tinuod pa nga dili siya “labad” sa ulo sa administrasyon ni Aquino ug kun tinuod nga dili siya mao ang nagbulabog sa Liberal Party hinungdan sa kapildehan ni Sen. Manuel “Mar” Roxas III pagka-bise presidente, angay na niyang ipatuod ang tanan.

Motabang siya sa pamunoan ni Aquino ug dili siya magbuot-buot aron matuman ang iyang politikanhong interes sa 2016.