Katungod mag-armas

Ang mga kriminal yano lang kaayong makadaladala og armas, basta tagoan lang sa dala nga bag o iloklok sa isul-ob nilang jacket o T-shirt.

Tungod sa pagpatuman sa balaod sa helmet, migara ang mga drive-by shooting diin ang mga killer dili mahadlok nga mo-operate bisan sa kahayag sa adlaw tungod sa kalisod ilhon ang ilang dagway nga giputos sa helmet.

Sa mga pagpamanhig nga nahitabo, ingon niini ang sitwasyon.

Ang nahitabo sa magsuong Ting nga mikalas og usa kanila, ug ang katapusan kang Nestor Zamora sa Taheiyo Cement, naghatag kanato og paghulagway unsa ka-agresibo sa mga kriminal motira og target gamit ang armas nga yano lang kaayong dad-on.

Sa maong mga panghitabo, daghan ang nakaingon nga maayo pa ang mga kriminal yano lang makadaladala og armas. Kita hinuong responsable nga mga tawo, maglisod sa pagdaladala og armas sa publiko kun wala’y permit to carry firearms outside residence (PTCFOR).

Ang makaluluoy mao ang mga target, ilabi na sa mga peryodista ug brodkaster sa radyo nga daghan kaayo og kontra nga mga dagkong tawo nga mahalangan sa birada sa pamantalaan ug radyo.

Didto sa Estados Unidos sa Amerika, wala na kinahanglana pa ang PTCFOR. Ang armas nga mapalit sa usa ka rehistradong gunstore, kun malutsan og lisensiya sa ilang gobyerno, automatic na nga adunay permit to carry.

Sa Amerika, tipik sa Amendment sa ilang Konstitusyon ang “right to bear arms” busa ang paghupot ug pagdala og armas usa ka katungod, ubos gihapon sa ilang mga estriktong regulasyon.

Dinhi sa Pilipinas, ang paghupot og armas usa lamang ka prebilihiyo gikan sa gobyerno. Ang pagdaladala niini nagkinahanglan og permiso.

Maayo unta og walay korupsiyon sa lukatanan og PTCFOR nga mao ang Philippine National Police (PNP) kay makuha lamang nato og barato ang maong permit.

Espoko mo na, ang tawo nga molukat og PTCFOR magkinahanglan og labing gamay P15 mil!

Busa panahon na tingale nga tan-awon sa mga magbabalaod ang posibilidad pagpasar og balaod nga maghatag og katungod sa mga responsable nga indibidwal paghupot og armas ug pagdala niini ngadto sa publiko isip proteksiyon.

Nasayod ang atong mga awtoridad nga dili sulbad ang “gunless society” sa pagpaubos sa krimen. Kun wala’y armas ang mga tawo, ang mga kriminal maoy mabulahan tungod kay nasayod sila nga ang ilang mga target wala’y armas nga ikasukol. Daghan nang mga proposal nga kaming mga anaa magtrabaho sa media hatagan og special license ug permit nga makahupot ug makadala og armas, apan hangtod karon nagpabilin gihapon kining proposal ug wala gihapon mapatuman.

Pareho lamang kini sa ubang mga balaudnon nga pabiling nag-ung-ong sa Kongreso sama sa pag-decriminalize sa libel ug pag-usab sa venue niini; right to information ug uban pa nga gitumong alang sa among proteksiyon.

Kada adjourn sa congress, kining maong mga balaudnon mawala na sa public discussion. Sa mosunod nga congress, balikon na usab og tuki, apan dili gihapon mapasar hangtod sa sunod congress.

Sa laktod, ang pagtuki sa maong mga balaudnon pagana lang sa mga tawo nga unta makabenepisyo niini.