Gitay-og ang Metro Cebu sa duha ka hitabong pagpamusil nga naglambigit og magsuong negosyante – silang Nicolas Ting nga gibanhigan sa barangay Cabancalan, Mandaue ug manghod nga si Manuel Ting nga gibanhigan-patay sa barangay Tisa, siyudad sa Sugbo.
Na-alarma ang mga business community sa Metro Cebu tungod sa nahidangatan sa magsuong Ting. Ang kapolisan mi-umol gilayon og Task Force aron pag-imbestigar sa krimen ug aron mailhan ug mataral sa hukmanan ang mga namusil.
Daghang anggulo ang gisubay sa kapolisan nunot sa pagbanhig kang Nicolas Ting didto sa Cabancalan, Mandaue; mao usab sa iyang manghod nga si Manuel nga napatay gyud sa (mga) mamumuno didto sa barangay Tisa.
Apan nahibaw-an sa mga dili konpirmadong estorya nga ang pamilyang Ting adunay mga suod nga mga opisyal sa Philippine National Police (PNP) dinhi sa Sugbo ug sa National Bureau of Investigation (NBI).
Busa adunay pagduda ang pipila ka mga sektor sa katilingban nga kining ilang pagkasuod sa mga opisyal sa mga law enforcement agencies seguradong makapalubog -- inay makatin-aw -- sa motibo sa krimen.
Hinaot sayop ang maong mga pagduda.
Ang kapolisan ug ubang law enforcement agency nga mo-imbestigar sa duha ka insidente gihinaot usab nga molihok sumala sa ilang gipanumpaan nga tulomanon isip tigpatuman sa balaod, aron makab-ot ang tinuod nga hustisya. Ug isalikway ang ilang pagkasuod sa maong banay.
Laing gipanghinaot sa publiko mao ang pagdakop ug pagpasaka og kaso sa tinuoray nga kriminal ug dili mga “fall guy” aron mahatag ngadto sa magsuong biktima ang tiunay nga hustisya.
Kining maong insidente magsugod sa lokal nga kapolisan kun dili ba sila modangop sa cover up kay ilang mga suod ang nalambigit niini.