EDITORYAL - Mahal ba ni Mayor Soc si Joavan?

Ang usa ka ginikanan maoy labing nasayod sa kinaiya sa iyang anak tungod kay siya ang nagsapupo niini, nagpadako, naniid kanunay sa iyang kinaiya ug batasan, ilabi na kun gimahal niya pag-ayo ang iyang anak.

Hinuon sa usa ka amahan o inahan   nga kuwang og pagmahal sa iyang anak, kuwang usab kini og pagtagad sa mga butang nga gihimo sa iyang anak, bisan sa kinaiya niini ug bisyo ug sa laktod iya kining gipasagdan tungod kay kuwang siya sa gugma.

Sa bahin ni Mayor Socrates Fernandez sa dakbayan sa Talisay ug sa iyang anak nga si Joavan Fernandez, daghan kaayo ang nagtuo nga usa ka pakitang tao ang gihimo sa mayor ngadto sa iyang anak nga kuno iya kining gimahal.

Kini tungod sa tuno sa iyang estorya nga dili siya gustong ipaslak sa rehabilitation center si Joavan kay kuno, ang pagbuhat sa ingon, usa ka pagpangangkon sa iyang bahin nga durugista si Joavan.

Maoy hinungdan nga daghan kaayong nag-ingon nga mas nagmahal pa si Kongresista Eduardo Gullas kang Joavan, tungod kay mibati kini og kaluoy pinaagi sa iyang pagsugyot   nga mas maayo gyung iparehab si Joavan.

Nalantawan ni Kongresista Gullas nga diha sa pagparehab kang Joavan, una sa tanan maedukar kini unsaon pagtanus ang hiwi niyang kinaiya, ug ang ikaduha ang pagsalbar sa iyang kinabuhi gikan sa mga nanagdumot kaniya.

Apan sa bahin ni Mayor Fernandez kinsa diduso sa pagparehab kang Joavan, nasabtan sa uban nga dili kini pagmahal sa usa ka amahan ngadto sa anak tungod gusto siyang dili mapitol ang kinaiya niini.

Nasabtan sa ubang tigpaniid nga ang gihimo sa mayor pamahala na lang og panitan si Joavan sa mga tawong dili na kaantos sa pagpanghasol niini matag karon ug unya.

Hinuon sa pagtuo sa mayor nga mapitol na ang kinaiya ni Joavan niining pagpaubos niya sa value formation seminar, daghang nanghinaot nga unta kini mosaler.