Ang pagpasalamat

Ang akong higala nga si Luis "Loy" Jurado adunay advocacy -- OK, adbokasiya -- nga ako sab gisagop. Kini mao ang pagkamapasalamaton -- gratefulness.

* * *

Si Loy, kinsa nanggungis na sa pagka-photo journalist, nakasinati na og daghang okasyon diin ang pagkamapasalamaton wala na hatagig importansiya. Gisalikway.

* * *

Adtong dakung lunop nga nahitabo sa Metro Manila, diin daghang mga charitable people ang nanghatag og relief goods, naobserbahan ni Loy nga ang mga biktima nag-inilogay sa relief goods apan wa siya’y nadungog nga dunay mibungat og "Thank you" or Salamat po."

* * *

Dinhi sa ato, naay gatusan ka mga kabus nga mga bata nga gipanghatagan og schoolbags ug uban pang school supplies apan, matud pang Loy, wa gyo’y bisan usa sa mga bata nga mi-"Thank you" sa nanghatag.

* * *

Dili ta pakasad-on ang mga bata, suma pang Loy, kundili ang mga ginikanan ug mga maestra sa eskwelahan. Kay kun wa lang kuno wad-a ang subject nga "Good Manners & Right Conduct," ang mga pupil makakat-on gyud sa maayong pamatasan.

* * *

Bitaw. So, uyon ko sa sugyot ni Tolin de la Serna ug Loy Jurado nga ibalik ang subject nga "Good Manners & Right Conduct" sa atong mga eskwelahan labi na sa lower grades.

* * *

Ang sex education naman nuon ang gihatagan og puwersa nga maapil sa school curriculum. Matud pa sa uban: "Sagdi lang kay makat-onan ra gyud kanang sex sa mga bata." Naa say uban nag-ingon: "Suheto na baya ang mga bata ron bahin sa sex."

* * *

TRIVIA -- Way problema nang Transcentral Highway diha sa Balamban. Ang problema mao ang pipila ka mga drayber nga way kasinatian sa pagmaneho’g sakyanan sa mga highway nga susama sa Transcentral.