Niining nagkaduol nga kinutuban sa ilang kagamhanan, ang pamilyang Arroyo mihimo sa tanang mahimo aron ipasiatab ang ilang mga nahimo sulod sa siyam ka tuig nila nga pangatungdanan.
Samtang si Presidente Gloria Macapagal Arroyo migahin og minilyon ka pisos aron ipahibawo sa publiko ang iyang mga nahimo pinaagi sa pagbayad og mga TV commercials ug ingon man usab atol sa selebrasyon sa Independence Day niadtong Hunyo 12, ang iyang bana, ang First Gentleman nga si Jose Miguel Arroyo wala sab magpaawahi. Si FG milusad sa usa ka libro nga nagpakita sa iyang mga nahimo sulod sa siyam ka tuig nga pagpangatungdanan sa iyang asawa. Gipakita ni FG ang mga kalampusan nga iyang nahimo ug sa iyang foundation diin matud niya daghan ang mga nakapahimulos.
Wala pa ko ka kuha og kopya sa maong libro apan basi sa mga report nga namantala, ang katapusang bahin sa libro maoy tubag ni FG sa daghang mga pasangil sa anomaliya ug pangurakot batok niya ug sa iyang asawa. Of course, di gyud moangkon si FG mao nga nasayod natang daan nga pulos gyud panghimakak ang unod niini. Igo lang miingon nga First Gentleman nga kun duna man gani kuno silay sayop nga nahimo sulod sa siyam ka tuig nila nga paghari sila na maoy manubag niini ngadto sa kahitas-an. Dili ba hilas pamation? Kun akoy FG dili nako mangandoy nga moabot ang maong higayon nga moatubang ko sa paghukom. Ang labing maayo niyang gihimo mao ang pag-angkon sa mga pasangil sa anomaliya ug paghinulsol aron kun moabot man ang higayon nga moatubang na siya sa paghukom makasugakod siya sa kasuwaw sa Ginharian sa Langit.
Nagtuo tingali si FG nga didto sa kaugalingong libro nga gipublikar sa iyang foundation iyang mapasupot ang tanan niyang buot isulti nga walay magbuot unsay ipublikar o dili. Unsaon dili man siya kapatuyang sa mga sakop sa media.
Apan ang pangutana pila man lang kaha ang mobasa sa iyang libro? Kun duna may mobasa, motuo sab kaha sa unod niini nga klaro man nga self-serving sanglit ang nagpublikar ang iya ra man sab nga foundation?
* * *
Ang labing awahi nga trahedya nga nahitabo sa Trans Central Highway diin 21 ka mga kinabuhi ang nakalas kasagaran niini mga langyaw gikan sa nasud sa Iran, nagbukas sa mas seryosong problema sa dakong kakuwangan sa atong gobyerno pagbutang sa gikinahanglan nga mga safety devices aron malikayan ang susamang aksidente.
Ang Department of Public Works and Highways mismo admitido nga wala mamintinar og maayo ang karsada tungod sa kakuwang og budget. Walay igo nga mga road signs ug railings.
Unsaon sab gud nga duna man say mga tawo nga mapahimuslanon kawaton man sab ang mga safety gadgets nga ibutang sa atong gobyerno. Sukad sa pagsugod sa pagtukod hinuon sa maong karsada daan na ning depektoso.
Tungod kay basi sa kasayuran nga akong nahipus wa ni’y klarong plano. Ang usa sa mga membro mismo sa Regional Development Council maoy mitug-an nga walay master plan ang pagtukod sa Trans Central Highway. Gawas nga minus ni sa gikinahanglan nga mga road signs, delikado sab kaayo ang maong karsada sa landslide sanglit naglatas ni sa daghang mga “fault lines.”
* * *