Pundo ra ang giapas

Dili ang pagtudlo sa kabatan-onan sa dautang resulta sa sayong pagpamiga ang tinguha sa Department of Education kun dili ang dakong pundo sa United Nations Population Fund nga nagpaabot alang sa mga nasud nga buot mopatuman og bisan unsang programa nga magpagamay sa populasyon.

Korupsiyon lang gihapon!

Mao kini ang hinungdan nganong naglumpayat ang mga opisyal sa DepEd nga masugdan karon ang “sex education” dili lamang sa mga Grade 5 pupils kun dili ngadto sa labing bata sa 80 ka mga public elementary ug 79 ka public high schools.

Anad na niini ang administrasyon ni Pres. Gloria Arroyo sa pagpangab-ot og mga “funding” gikan sa mga ahensiya sa gawas sa nasud, usa na niini ang UN.

Kun nakahinumdom kamo, wala maundang ang pagpakatap sa Department of Health og mga contraceptives sama sa condom hangtod karon. Kini bisan dugay nang suspendido ang “family planning program” sa Pilipinas, ug wala pa ang Reproductive Health Bill.

Nganong sa 80 ka tunghaan sa elementarya ug 79 sa sekundarya ra man nga kadaghan sa mga public school sa nasud?

Kini aron lang gyud ma-justify nato sa UN nga nagsugod na ang “sex education” aron makatilok og salapi gikan sa UN Population Fund? Adunay daghang mga programa ang gobyerno sa atong nasud nga gipundohan og mga international agencies, sama sa UN. Apan walay positibong resulta ang mga programang ilang gigunitan.

Tungod kini sa batasan sa mga Pilipino nga nag-apas lang sa pundo ug dili sa benepisyo sa programa ngadto sa mga target clienteles. Nagtuo ko nga kining sex education mao ra kadtong mga leksiyon sa dihang elementary boy pa ko sa Regino Mercado Elementary School sa dihang gitudloan kami kalabot sa Reproductive Organs sa tawo.

Nakahinumdom pa ko sa mga “chart” nga gi-display sa bongbong sa Regino diin didto nakaguhit ang kinatawo sa lalaki ug babaye ug gi-esplikar nga kun mag-abot ang semilya sa duha matawo ang laing linalang.

Dihay libro nga akong nabasa sa akong high school days sa Don Carlos A. Gothong Memorial National High School nga nagpasabot sa resulta ngadto sa lalaki kun magpa-vasectomy ug mogamit og condom; unsay kalahian sa vasectomy ug tubal ligation; unsay epekto sa pag-inom og pills ug ang natural family planning. Unsa pa man ang ilang nahunahunaang idugang sa sex education?

Walay tawo nga wala masayod sa dautang epekto kun mag-una-una og pamiga. Apan sa elementarya gisabwag sa Simbahang Katoliko, pinaagi sa mga school catechism, ang dautang resulta sa pre-marital sex.

Unsa pa man?

Ang mga ginikanan wala usab magmakulang sa pagtudlo sa ilang mga anak sa dautang resulta sa sayong pagpamiga. Walay ginikanan nga gustong iyang anak sayo moburot o sayong makapaburot.

Ug kun aduna man dihay mga batan-on nga sayong mimabdos ug nakapamabdos, kana tinuyoan na gyud na.

Pag-usik lang sa panahon kining sex education.

Aduna pay daghang sagubangon ang mga tinun-an sama sa English ug Mathematics nga nagka-ubos ang performance sa mga tinun-an karon.

Dugangan pa niining sex education, mosamot na sila og kabug-at ang ilang mga leksiyon.