Morag gipanghingusgan nag maayo sa DepEd ang promotion paggamit sa condom. In the guise sa pag-edukar sa kabataan unsa kining sex, ila na konong isukip sa curriculum sa elementarya ang sex education. Sa ato pa, ilang tudloan ang mga bata sa elementarya kun giunsa sila pagbuhat sa ilang papa ug mama, ug unsay mga paagi aron kalikayan ang pre-marital sex.
Gumikan sa ka-linghod ug ka-inosente pa sa panghunahuna sa mga bata, di kalikayan nga dili gayud sila makasabot sa hingpit unsa man ang gitudlo kanila sa ilang ma’am ug sir, bahin sa sex. Ug natural, inig-uli nila sa tagsatagsa nila ka panimalay, mo-demand gayud sila gikan sa ilang mga papa ug mama, sa dugang katin-awan sa mga butang nga wala nila masabti pag-ayo sa eskwelahan.
Andam ba unya sila si papa ug mama pagtubag ug pag-satisfy sa naglibog nga panghunahuna sa bata? Sa ato pa, maayo tingali unahon nato pag-edukar ang mga papa ug mama, una kita muadto sa inosenting pangutok sa mga bata.
Pastilan, pagkadaghang problema sa DepEd. Anaa ang kakulang sa mga classrooms, ka-inadequate sa mga material ug mga himan sa pagtudlo, kakulang sa mga textbooks, kakulang sa mga magtutudlo mismo, ug labaw sa tanan, ang atong educational system, wala makatubag sa current nga educational need sa kabataan.
Maoy hinungdan nga lupig sa Iningles ug kaalam ang mga college graduate karon sa mga grade six graduates sa kanhiay’ng panahon.
Anyway, ila na mang i-expose sa sex ang ato karong mga inosenting kabataan, ug tungod kay dili kalikayan nga ila usang ilakip sa sex education ang paggamit sa condom, unsa may ilang itubag inigpangutana sa mga bata kun duna bay condom for children?
Ug ma-curious na man unya ang otherwise, inosente nga mga bata, kun mangutana usab unya sila kun duna bay condom alang sa ilang mga lolo, unsaon man ni pagtubag ni ma’am ug sir?
Daghan gayud unya ang mga pangutana gikan sa walay buot nga kabataan. Ug lakip na unya ang mga papa ug mama, mabawog panagang sa maong mga pangutana. Ug matud pa nila ni Tony Avila ug Arnel Bacalan, ang ato unyang kabataan sa elementarya, magbawon-bawon nag condom.
Sa ako nang giingon, daghan kaayo’g problema ang DepEd, ambut ngano nga nasulod man kini sa ilang hunahuna. Mao ba kini ang solusyon sa daghan nilang problema? Dili ba unya kini makadugang sa daghan nilang problema ?
Ug dili ba unya kini, makadugang sa teenage delinquency ug sa naghitak na karon nga pre-marital sex sa atong nasud ? Sumaa, daghan na kaayo karon ang single parents, mga unwelcome pregnancies. Mga kalihokan karon sa atong mga batan-on nga nagduwaduwa na lang sa sex, openly ug daku pa nilang garbo ang pagbuhat sa ingon.
Ang sex education ba sa elemetarya maoy solusyon niining tanan, DepEd?