Sex education? Maayo pag ibalik ang Good Manners & Right Conduct!

Aron kono ma-edukar ang kabataan, lakip na sa nagtungha pa sa kindergarten, tudloan kono silang daan unsa kining sex, aron dili sila mag-sex tapus sa ilang pag-gradwar sa kindergarten.

Sa ato pa, inigka-grade one na nila, suhito na sila kun unsa kining sex ug maglikay na sila pagpakig-sex hangtud maminyo. Ug tungod kay duna man gyuy dili makapugong sa kahinam sa lawas, ug dili makahuwat nga magminyo, tudloan sad kono sa Department of Education ang mga bata unsaon pagpasulod sa condom ug ubang matang sa contraceptive.

Niini nga paagi, kun ma-fully educated na ang tanang kabataan sa nasud, wala nay unwanted nga mga pregnancies, ug makapatuyang na sila to indulge in sex. Ang ilang tumong mao nga di kinahanglan maghuwat pa nga magminyo, mahimo nga mag-sex kada adlaw ug gabii, ug dili na mahadlok nga mamabdos tungod sa mga contraceptives.

Kusuga na kaha sa halin sa condom ini no ? Thanks to Cabral’s DepEd !

In the meantime, kinsa may motudlo sa sex education ? Ang ato karong mga magtutudlo? Unsa sila ka qualified pagpasabut niining delikado kaayo nga subject?

Unya, inig-uli sa mga inosenting bata ngadto sa ilang mga panimalay, andam ba ang ilang mga ginikanan pagtubag sa ilang mga pangutana bahin sa sex? Nganong athon man gyud nato ang atong mga bata pagpahibawo unsa kining sex?

Pananglitan kun mangutana ang bata kun giunsa sa Ginoo pagpanganak og daghan kaayo nga wala man siyay asawa? Unsaon man ni pagtubag sa usa ka teacher? Sa ubang nasud nga walay Ginoo-Ginoo, sayon ra kaayo ang pagtubag niini, kay igo lang silang moingon nga dili tinuod nga dunay Ginoo, ug kitang tanan, gikan gyud nila ni Adan ug Eva, kay wala pay condom sa ilang panahon.

Ang makadaut lang kun dili sad sila motuo nga dunay Adan ug Eva, kaylagi, di man sad sila motuo nga dunay Bibliya.

Anyway, alang nako, maayo pag ibalik tong subject sa Good Manners & Right Conduct. Kahinumdom ko nga, among others, pirme ming pahinumdoman sa among mga magtutudlo sa ka-sagrado sa sex., busa di maayong duwaduwaan. Ingonman, gisilsil sa among alimpatakan ang chivalry, ang pagka-gentleman, ug pagtahod kanunay sa kababayen-an.

Sa ato pa, bisan kun walay sex education, miila kami sa pagka-balaan sa sex, ug sa kanunay namong pagtahod sa kababayen-an, nga dili kini sila mga toys nga duwaduwaan lang. Ang nakadaot lang kay karon, mora mag sugot lang pod ang uban natong kababayen-an nga duladulaan lang.

 Sa atong makita sa telebisyon gihimo na silang kalingawan, maayong pagka-exploit, nawala na ang kaligdong ug kabalaan sa lawas, kay hapit na lang maghubo! Sex education anyone?