Alkanse apan bintaha

Niining nagpadayon nga bingkil sa mga opisyal sa Kapitolyo mamahimong nakapabor si Gobernador Gwendolyn Garcia kun itandi ni Bise Gobernador Gregorio Sanchez Jr. kini tungod kay mas gamhanan ang gobernador.

Tungod kay gamhanan ang gobernador mas daghan siya og mamahimong buhaton aron maapiki si Sanchez sa iyang paglihok aron pagtuman sa iyang tahas isip ikaduhang labing taas nga opisyal sa lalawigan.

Pananglitan ang gihimo karon sa buhatan ni Garcia nga pagbawi sa unom ka mga sakyanan nga gidistino didto sa opisina ni Sanchez niadtong amigo ug kaalyado pa sila sa One Cebu Party.

Usa lang ni sa mahimong buhaton ni Garcia ug mas daghan pa ang posibling mahitabo sa umaabot. Lakip niini ug angayang magpaabot nang daan si Sanchez nga dili siya makapanghatag og financial assistance ngadto sa mga barangay kapitan.

Bisan simple nga solicitation sa pista sa kabarangayan posibling wa nay pundo nga matiti si Sanchez aron ihinabang gawas kun ang personal niyang kwarta maoy iyang gamiton. Kontrolado sa gobernador ang budget sa Kapitolyo sanglit siya maoy magpreparar niini.

Bisan tuod ang Hunta Probinsiyal diin si Sanchez maoy presiding officer dunay gahom pagpung-ol sa budget nga iduso sa gobernador apan imposibli ning mahimo ni Sanchez nga magbinugtong kun way suporta sa mga board miyembers.

Apan ang dakong pangutana kinsa may monunot niya nga ang tanang sakop sa Hunta Probinsiyal, gawas ni Arleigh Sitoy, pulos man membro sa partido ni Garcia?

Niining puntoha makaingon ta nga way dag-anan si Sanchez ni Garcia. Apan kun imong tugkaron ang lintunganay niining tanan mogawas nga mas bida ang bise gobernador sa mata sa publiko.

Diha sa kasing-kasing sa katawhan mas bintaha si Sanchez niining ilang away ni Garcia tungod kay tukma ang reaksiyon ni Sanchez sa labing awahing pagpanglugpit sa buhatan ni Garcia kaniya.

Ang pagbawi sa mga sakyanan diin lakip ang usa ka mini ambulance nga nadistino sa Tuburan bisan kun katungod sa gobernador ang paghimo niini apan dili ni maoy tan-awon sa katawhan.

Ang makita sa publiko mao nga gibawi sa gobernador ang butang nga importante ug gamit kaayo alang nilang mga kabus. Maantigo si Sanchez, iyang gisakyan ang kalagot ni Garcia kaniya aron mogawas nga makaluluoy ug hero sa mga kabus.

Ang pag-ingon ni Sanchez nga andam niyang atubangon ang mga kaso nga isang-at ni Garcia batok niya aron lang pugngan nga mabawi ang mini ambulance dakong puntos alang sa bise gobernador.

Busa kun magpasuwabi ang pagpangaway ug pagpanggukod ni Garcia ngadto ni Sanchez dili na ta masurprisa kun sa mosunod nga mga eleksiyon mosamot kagamay ang mayoriya sa mga Garcia.

* * *

[email protected]