Sa buwan sa Hunyo...

Daghan ang mga panghitabo niining buwan sa Hunyo. Gawas nga magsaulog ko sa akong adlaw’ng natawhan, karong buwana ‘sab ang pormal nga pagbukas sa klase. Makapangawot na ‘sab ang mga ginikanan sa nagtapun-og nga balayranan ug sa mga gikinahanglan aron lang makapatungha sa ilang mga anak. Ang Hunyo ‘sab ang buwan alang sa mga buot magpasakal. Tungod sa Roman goddess of love nga si ‘Juno’, diin gikuha ang panga’n sa buwan sa Hunyo, daghan ang magpadayag sa ilang hiniusa ug wa’y katapusang gugma atol ning buwana.

Ang labing mahinungdanon nga mahitabo karong buwan sa Hunyo mao ang pormal nga pagkanaog ni Presidente Gloria Arroyo sa pwesto. Human sa dugay nang panawagan nga mokanaog na sa katungdanan ang presidente luyo sa mga kontrobersiya nga iyang giatubang, nahatagan na gyud og katumanan ang pangandoy sa kadaghanan. Luyo sa paggawas sa mga pagtuon nga nagkagidlay na ang ‘trust rating’ sa presidente, ang labing ubos sukad sa panahon sa diktadorang Marcos, karong matuman na ang panawagan nga mobiya na sa Malacanan ang presidente.

Apan wa’ magpa-ulahi ang administrasyong Arroyo sa pag-alsa sa kaugalingong bangko niini sa gipagawas nga pahinumdum sa telebisyon, usa ka buwan sa di’ pa ang pagkanaog sa presidente sa katungdanan. Gipasiatab sa presidente ang mga tulay nga napatukod, mga da’n nga gipaayo, mga pantalan nga nabuksan, mga tugpahanan nga napalig-on pa ang serbisyo. Ang maong mga pasilidad ang nakaaghat sa mga kompaniya sa barko, mga bus ug eroplano nga mobiyahe sa mga dapit nga kaniadto wa’ masudli og rota. Ang buwan sa Hunyo, buwan ‘sab sa pagpasiatab sa kasamtangang administrasyon sa mga nahimo niini.

Usa ko sa mga nakadayeg sa ‘nautical highway’ sa presidente. Di’ malalis, dako kaayo og nahimo namong mga nagpuyo sa isla ang mga proyekto sa kasamtangang administrasyon. Kung kaniadto, kausa lang sa usa ka semana ang biyahe paingon dinhi sa Sugbo, karon ikaduha na sa usa ka semana. Kung kaniadto, usa ka kompaniya lang sa barko ang nagserbisyo, karon may duha ka kompaniya na sa barko nga nag-alagad sa maong rota. Dako gyud og natabang ang nautical highway sa pagpada’ sa mga produkto, pagpadali sa biyahe ug paghiusa sa daghang mga pamilya nga nagkatibulaag tungod sa kalayo sa isig ka lugar ug kakuwang sa kahimanan sa pagbiyahe.

Apan may di’ maayong punto ang pahinumdum sa presidente. Di’ maayo nga ibutang nga mas daghan pa siya og nahimo itandi sa tulo ka mga nangagi nga presidente. Sa nigawas nga pahinumdum, bisan pa kuno kong itipon ang mga nahimo ni kanhi presidente Ramos, Aquino ug Estrada, di’ ni makalupig sa mga nahimo ni Presidente Arroyo. Nakalimot ang Malacanan nga siyam ka tuig si Arroyo sa katungdanan ug normal lang nga may daghan siyang mahimo itandi ni Ramos ug Aquino nga tag unom ka tuig lang sa pwesto o ni Erap nga kapin lang sa duha ka tuig.

Ang buwan sa Hunyo, mao ‘sab ang panahon sa paglaom ug mga pangindahay. Sa gitakdang paglingkod ni Noynoy Aquino sa pwesto, daghan ang nagtuo nga mahitabo na ang dugay nang gipaabot nga pagpanglimpyo sa dungog sa gobyerno nga nabuling-bulingan sa kurapsyon sa mga opisyal ug uban pang kahiwian. Sa gitakdang pagbanos sa mga bag-ong lider, nisulbong ang pagsalig sa katawhan nga matuman ang pagsilot sa mga kawatan sa gobyerno ug mahatagan og pagsalig ang publiko sa sistema sa pagpadagan sa nasud.

Sa pagpupos sa buwan sa Hunyo, mao ang pagdawat sa mga bag-ong hugna sa mga kalihim ug uban pang mga opisyal nga itudlo sa bag-ong administrasyon. Ang buwan sa Hunyo, mao ‘sab ang tukma nga panahon aron hinuklogan ug tan-awon unsay posibleng mahimo ug matabang alang sa usa ka malambuon ug ligdong nga nasud.

* * *

Email: [email protected] or [email protected]