Gipirmahan na ni Pres. Gloria Arroyo ang Akta Republika 10088 o Anti-Camcording Act of 2010.
Ang maong balaod magsilot ni bisan kinsang masakpan nga maggamit, maghupot ug magkontrolar og audio-visual recording device – kagamitan kini nga gigamit aron padaghanon ang mga “pirated” nga mga DVD nga salida ug musika.
Ang maong balaod naggikan sa hiniusang balaodnon nga House Bill 5699 ug Senate Bill 3529.
Isip bag-ong balaod nga nailang “Anti-Piracy Law,” gukdon na sa gobiyerno ang mga pirata sa mga salida ug musika ug pagtaral kanila sa hukmanan. Kun mamatud-an nga sad-an, mahimo silang makamulta og kantidad nga P50 mil ngadto sa P750 mil, depende sa gitas-on sa gi-rekord, ug pagkabilanggo gikan sa unom ka bulan ug usa ka adlaw ngadto sa unom ka tuig ug usa ka adlaw.
Sumala sa gimbut-an sa maong balaod, ang kapolisan, inabagan sa National Bureau of Investigation (NBI-7), Optical Media Board (OMB), operator sa mga sinehan, ug mga tag-iya sa mga cinematographic films, audiovisual works ug soundtracks, maoy mopatuman sa balaod.
Ang maong balaod nagtugot sa mga awtoridad pagsulod sa usa ka lugar diin gituohang adunay mga pirated nga mga salida ug musika aron manakmit ug manakop bisan walay warrant nga giisyu sa korte.
Usa kini ka dakong kalambuan sa nasud nga nahimo nang usa sa mga kapital sa mga pirata sa rehiyon sa Asya diin daghan ang mga pirated nga mga salida ug musika.
Makahatag kining maong balaod og dakong kausaban sa mga lugar diin dayag ang pagnegosyo og mga pirated DVDs. Dinhi sa Sugbo, sama sa kauluhan, dayag kaayo ang pag-display ug pagpamaligya og mga pirated DVDs sa kadalanan, mga dagkong tindahan ug mga kamerkadohan.
Apan ang dakong kausaban nga mamugna niining maong balaod mao ang paghibalik sa kita sa mga artista ug mga producer nga sa pagkakaron, gi-alkanse sa mga pirata.