Hunonga ni uy!

Kun pabayron gani sa Commission on Audit (COA) ang mga opisyal sa dakbayan kabahin sa dagko kaayong allowances nga gihatag nila ngadto sa mga huwes, ang akong ikasulti mao nga “maayo ra.”

Daan na ako nga nag-ingon nga dili kini angay’ng himoon sa mga opisyal sa dakbayan kay tabla ra nga giusik-usikan nila ang maong kwarta nga daghan man unta kaayo ang gastohanan.

Kun moingon sila nga usa kini ka paagi nga ma-discourage ang usa ka huwes nga magbinuang, makaingon ko nga mahimong tinuod mahimo usab nga dili. Kun ang batasan sa huwes kusug g’yud mangilkil, iya g’yud kana.

Daan na nga dagko og sweldo ang mga huwes, mas dagko pa man gani kini og “basic pay” kay sa mga konsehal. Bisan unsa na lang g’yud ang mahuna-hunaan sa atong mga opisyal.

Kaniadto, diha’y ilang plano nga pahatagan usab og sakyanan ang mga huwes. Angay ninyo nga masayran nga wala g’yuy huwes nga naglakaw kay walay sakyanan. Pulos man intawon kana sila dunay mga sakyanan uy.

Hapit tanang huwes duna sa’y kaugalingong laptop, apan gusto g’yud sa mga opisyal nga papalitan nila’g laptop ang mga huwes. Ang uban ra ba sa mihimo niining maong mga sugyot mga abogado.

Dili ba makaduda na hinoon kita nga basin og usa kini ka matang sa pagpanuborno? Sayonan ka nga kun padad-an nila og kopya sa resolusyon nga aprobado sa konseho, ang mga huwes masayud g’yud kun kinsa ang naghimo sa sugyot.

Kining maong mga abogado nga konsehal duna baya’y mga kaso nga gihuptan nga anaa pending sa sala niining maong mga huwes.

Balikan nato ang isyu paghatag og allowance nga katumbas sa basic monthly pay sa usa ka huwes. Sayonan ka nga duna may huwes nga nagsweldo na karon og P60,000 ngadto sa P80,000 ang buwan?

Sa ato pa ingon usab niini ang allowance nga ihatag sa dakbayan ngadto sa matag usa ka huwes. Tsk.Tsk.Tsk.

Usa kini ka matang sa pag-usik-usik sa kwarta. Wala ba kamo makakita nga daghan kaayong angay’ng gastohan niini?

Modayeg g’yud ko ni Mayor-elect Mike Rama kun putlon niya kining pagpahatag og dagko kaayo nga allowances sa mga huwes. May gihatag na man ang dakbayan nga tag P5,000 sa mga huwes, apan gipun-an g’yud.

Daku kaayo ang akong pagsaludo ni Regional Trial Court (RTC) Judge Gabriel Ingles kay mora’g siya ra ang wala modawat sa maong daku kaayong allowance gikan sa dakbayan.

Moyukbo ko kanimo Judge Ingles.

* * *

Awhag nako sa mga opisyal sa dakbayan, ilabi na sa mayor ug sa mga sakop sa konseho, ayoha tawon ninyo paghuna-huna kun unsay angay’ng gastohan sa atong salapi.

Kun magkatol g’yud ang inyong kamot nga mohatag og dagku nga allowance sa mga huwes, hatagi sila gikan sa inyong kaugalingong kwarta.

Nangutana ko sa ubay-ubay’ng mga opisyal sa City Hall kabahin niining maong isyu, wala g’yuy nakagusto. Duna pa gani ubang konsehal nga miingon nga supak g’yud unta sila pero naikog lang sa ilang kauban, ilabi na nga si Mayor Tomas Osmeña man kuno ang mihukom niini.

Mao kini ang rason nga kamong mga konsehal nga sakop sa usa ra ka partido hinganlan nga “rubber stamp” sa inyong mga kontra sa politika. Usahay bitaw makaingon man ko nga husto baya ang pagbunyag ninyo niini.