EDITORYAL - Manubag si Arroyo

May pipila ka adlaw sa dili pa mabahas ang termino ni Presidente Gloria Macapagal Arroyo gikan sa Malacañang.

Samtang lanog ug sipa na kaayo ang mga bahad ug pasidaan nga ang bag-ong administrasyon moutingkay sa tanang mga butang nga kasuhonon nga maglambigit sa taligawas na nga Pamuno nasud

Daghang mga gipanghinganlan ang mga suhito sa balaod nga kalagmitang mga kaso nga atubangon ni Presidente Arroyo kun maghubo na siya sa gahum isip Pangulo sa Pilipinas.

Busa karon pa lang daan mapanglantawan na sa kadaghanan ang senaryo bahin sa dag-umong mga adlaw nga umaabot sa kinabuhi sa Pamuno nasud.

Dili sayon ang pagbaton og kaso diin sa matag karon ug unya maoy mosungog sa galamhan sa usa ka tawo ang mga kabalisa ug kabalaka sa kinabuhi.

Apan ang administrasyong mopuli kang Presidente Arroyo, tawo ra usab nga may kalag ug pagbati nga sayon rang lukmayon kun mabati niini ang mga hapuhap sa mga pakigsuod nga hinigala ug minagsuong hangyo nga mahimong sagupon ni Presidente Arroyo.

Gawas tingale kaha kun sa iyang kaugalingong konsensya , hinlo ang iyang tanlag nga dili siya mapiit kun may mga kasong isang-at batok kaniya sa umaabot nga administrasyon, mahimo rang ibali wala sa Pamuno nasud ang mga bahad nga pasakaan siya og nagkadaiyang mga kaso mugna sa mga kuwestiyonable kaayong mga patigayon nga wala niya mapitol ilawom sa iyang administrasyon .

Apan kun mahinuktokan sa Pamuno nasud nga mahasol ang iyang kinabuhi sa umaabot nga mga adlaw, mas maayo pang karon palang daan ipakita na niya nga siya usa ka tawo nga makaantigong mangayo og pasaylo sa mga butang nga gituohan niyang nalapas niya isip usa ka lider , ubos sa gitawag nga “command responsibility”.