EDITORYAL - Walay respeto sa holiday

Gisibog na usab ni Pres. Gloria Macapagal-Arroyo ang Independence Day sa Hunyo 12, Sabado, ngadto sa 14, Lunes.

Ang konsepto sa holiday naggikan sa pinulungan sa Old English nga “haligdaeg.” Kaniadto, ang holiday usa ka espesyal nga relihiyosong adlaw mao nga gitawag og “Holy Day” hangtod nga nahimong “holiday” kanus-a ang mga tawo kinahanglang mamahulay sa trabaho ug eskuwela.

Sa Pilipinas, ang mga regular holidays gipahinungod sa importanteng tawo sama sa mga bayani sama ni Dr. Jose Rizal ug Gat Andres Bonifacio; ug ang uban gipahinungod sa relihiyoso ug importanteng kalihukan sama sa All Souls and All Saints Day, Holy Thursday and Good Friday ug sa matag Hunyo 12 nga Independence Day.

Busa ang holiday wala himoang espesyal nga adlaw nga walay importante ug memorableng rason. Bisan pa niini, si Pres. Arroyo walay kukaulaw nga mosibog og petsa sa holiday.

Gihimong rason ni Pres. Arroyo ang pagpalambo sa turismo sa nasud pinaagi sa pagbalhin sa adlaw sa holiday aron himuong duol sa Sabado o Domingo.

Sumala pa nga ang mga Pilipino dili magpanuko sa pagbiyahe alang sa bakasyon kun taas-taas og adlaw alang niini.

Ang maong rason dili paigo aron gub-on ang han-ay sa mga holiday pagsibog sa adlaw nga aduna untay importanteng gipahinungdan.

Ang orihinal nga petsa sa Independence Day mao unta ang Hulyo 4, ang adlaw kanus-a gihatag sa Estados Unidos sa Amerika niadtong 1946 ang kagawasan gikan sa mga Hapon. Gibalhin kini sa amahan ni Pres. Arroyo nga si anhing Pres. Diosdado Macapagal ngadto sa Hunyo 12, ang pagdeklarar ni Heneral Emilio Aguinaldo og kagawasan gikan sa Espanya.

Nawala na maka-usa ang importansiya sa petsa, ug karon usban pa sa pagpatay ang importansiya sa maong adlaw tungod lamang sa turismo ug pag-agni sa mga Pilipino sa pagbiyahe, inay paghinuklog sa ka-importante sa maong adlaw. Hinaot nga sa administrasyon ni Noynoy Aquino, respetohan na ang matag petsa sa holiday.