Tungod sa busy nga schedule kutob lang gyud ko sa saad nga mag-exercise aron mokunhod sab ang cholesterol level. Apan niadtong Domingo nga miagi nakalugar na gyud ko og jogging didto sa Fuente Osmeña Rotunda.
Bisan nagbinugtong ko nga naglibut-libot sa oval apan wala ko bati-a og kakapoy tungod kay nalingaw ko nga nagtan-aw sa mga tawo nga nagsuroy sa Fuente bisan nag-anam na og kalawom ang gabii. Dunay mga batan-on nga manag-uyab nga nanglingkod sa daplin samtang nagpauraray ang usag-usa sa ilang mga bukton. Duna say mga wala gyud makapugong, bisan sa kadaghan sa tawo nagpahipi gyud og tinusikay.
Gawas sa managhigugmaay nga nagpalabay sa oras sulod sa Fuente Rotunda panahon sa gabii, duna say mga pamilya nga nagsuroy pagsud-ong sa kanindot sa mga sugang dagitab sa dakbayan. Labi pa ang nindot nga mga siga sa nagkalain-laing kolor sa suga nga naghatag og dan-ag sa karaan nga “fountain” taliwala sa plaza. Sa akong pagtuyok-tuyok akong naaninaw ang dakong kakuwangan sa dakbayan og dapit nga magsilbi nga alternatibo nga suroyanan gawas sa mga dagko nga malls. Dili man gud tanan maka-afford didto sa mall.
Bag-o man gyud ang mayor sa dakbayan, hinaut nga si Mayor-elect Michael Rama mohatag og pagtagad niini. Nahinumdom ko sa sad ni Georgia Osmeña atol sa kampanya nga usa unta sa iyang programa kun nidaog pa mao ang pagtukod og plaza sa dakbayan.
Didto nako natugkad ang panginahanglan sa usa ka plaza diin mamahimong dapit kun diin ang matag yanong pamilya makahimo sa pagpanuroy nga wala magkinahanglan og daghang kwarta aron makatipon ug magkabonding.
Bisan ang Fuente Osmeña mamahimo na kaayo nga ma-develop ug magahinan og pundo alang niini. Maayo nga mabutangan bisan slide alang sa mga bata, seesaw , swing, monkey bars ug uban pa nga gamit sa playground alang sa mga bata.
Gamay lang ni nga butang apan dako ni og ikatampo pagpalig-on sa pamilya dinhi sa dakbayan. Kun lig-on ang matag pamilya siguro sa ngadto-ngadto maminusan sab ang badlongon sa katilingban nga maoy naghatag og problema sa gobyerno.
* * *
Hapit na mapupos ang summer apan daghan gihapon ang mag-ambahan paingon sa mga resorts matag weekend. Sa milabay nga duha ka weekend didto mi sa akong pamilya sa resorts apan grabe ka daghan ang tawo.
Sa miaging Sabado nga gisundan karong semanaha ang pamilya sa The Freeman, Banat ug Philippine Star mihimo sa among family day didto sa Portofino Resort grabe pud daghan kaayo ang tawo.
Karon nga weekend didto mi sa akong pamilya sa Obong Spring sa Dalaguete mao pud hapit dili makita ang tubig sa kadaghan sa tawo. Unya tungod kay peak season man sa pagkakaron dili kalikayan nga dunay mga resort nga magpatuyang pud, mahikalimot na sa maayong pagtratar sa ilang mga customers.
Sama sa ka walay batasan sa Intosan Resort sa dakbayan sa Danao. Gapa-reserve ming daan alang unta niadtong Sabado ug Domingo. Ang nakadawat sa among tawag niingon nga okey na ang among reservation, apan sa dihang mopaingon na unta mi niadtong Sabado nasurprisa mi kay pag-agi namo sa ilang opisina dinhi sa dakbayan aron bayran ang among reservation ila nang gihatag og lain.
* * *