EDITORYAL - Mabuhi ka, Cardinal Vidal!

Magsaulog sa ika-25 nga kasumaran sa iyang pagka-Cardinal si Arsobispo Ricardo Cardinal Vidal, karong adlawa.

Ning adlawa, angayang isipon kining espesyal nga adlaw sa mga Katoliko Romano sa Sugbo tungod sa dakong kalampusan nga naabot sa lider sa Simbahan dinhi.

Usa pa, si Cardinal Vidal maisip nga labing dakong gasa ngadto sa mga Sugboanon gikan sa Kahitas-an tungod sa iyang mga bertudes nga gidayeg ug gitamod sa mga Sugboanon – kabus ug adunahan.

Ang pontipiko sa Artsidyosesis sa Sugbo nakaserbisyo na sa mga Sugboanon sulod sa dugay nang katuigan sukad siya mipuli kang anhing Arsobispo Julio Cardinal Rosales niadtong Agosto 24, 1982.

Niadtong Mayo 25, 1985, gihimo siyang Cardinal ni anhing Papa Juan Pablo II.

Sukad siya mipuli ni Cardinal Rosales (kinsa namatay niadtong Hunyo 2, 1983), si Cardinal Vidal nagserbisyo na sa mga Sugboanon ug hangtod karon, bisan sa iyang katigulangon, nagserbisyo lang gihapon siya isip tinahod ug tinamod nga Cardinal, dili lamang dinhi sa Sugbo, kun dili sa tibuok nasud nga Pilipinas.

Ang kinatibuk-ang Simbahan, pinaagi sa Holy See sa Vatican, Roma, nakakita sa dakong natampo ni Cardinal Vidal sa Simbahang Katoliko Romano dinhi sa Sugbo, hinungdan nga bisan sa iyang aplikasyon pagretiro sa katungdanan niadtong tuig 2006, gilugwayan hinuon ang iyang termino.

Si Cardinal Vidal dili lumad nga Sugboanon tungod kay taga-Mogpog, Marinduque kini. Apan, ang iyang kasingkasing labaw pa sa usa ka Sugboanon tungod sa iyang gipakitang paghigugma sa Sugbo pinaagi sa pagpanginlabot sa mga isyu nga may labot ang mga Sugboanon.

Busa sibo lamang nga hatagan siya sa pagdayeg sa mga Sugboanon. Ug i-ampo nga lugwayan pa ang iyang kinabuhi aron makapadayon sa iyang pagserbiyo sa mga Sugboanon.