Bagong pag-asa

Ngayon ay bago na ang ating pangulo –

Anak ng bayani – bayani rin ito

Kung magagawa n’yang baguhin ang takbo

Maralitang buhay – buhay-Pilipino!

Sana’y tao siya na hindi gahaman

Sa hawak na pwestong ngayon ay nakamtan;

Sa anim na taon ng panunungkulan

Kasama mo kami sa tumpak na daan!

Ang ekonomiya nitong ating bansa –

Dapat palusugin nang hindi timawa

Mga mamamayang ngayon ay kawawa

At umaasa lang sa bigay-biyaya!

Dapat ding tuklasin ng bagong pangulo

Na ang edukasyon mapaganda ito

Sa silid-aralan ang dapat ituro

Matinong aralin at hindi pagago!

Kurapsyon sa Customs saka sa BIR –

Dapat ay matigil ang tong at lagayan;

Mga negosyante ay pangalagaan

Upang katulungin sa maraming hakbang!

Dapat pagsikapan ng ating gobyerno

Mga magsasaka’y umani nang husto;

Mga mangingisda sa lahat ng dako

Sa yaman ng dagat ay umaasenso!

Nasa sa publiko’t pribadong gawain

Dapat may umento sa sweldo’t tungkulin;

Ang anim na buwang batas sa employment

Dapat nang mawala o kaya’y ma-repeal!

Ang mga gawai’y di dapat kay Noynoy lang

Pati ang senador at mga congressman,

Mga gobernador, mayor at konsehal –

Tatrabahong lahat sa unlad ng bayan!

Kaya ngayon tayo ay dapat umasa

Darating sa atin ang bagong pag-asa;

Sa bagong pangulo’t ibang nahalal pa

Tayong mga Pinoy magiging masaya!