Mga leksyon sa miaging eleksyon

Ang una natong nakat-onan sa miaging eleksyon mao nga mahimo diay nga mahibaw-an sa labing dali nga panahon ang resulta niini. Lahi sa atong naandan nga tagpila ka adlaw, pila ka semana, pila ka buwan una mahitabo ang proclamation. Apan karon, a matter of hours lang.

Dali usab kaayo ang pagbotar, despite sa kalangay ug kakapoy una ikaw makabotar, ug sa ka-gamay sa hugis itlog nga imong i-shade. At least, itandi sa unang mga eleksyon, unexpectedly, dali ra kaayo ang pagbotar. 

Laing leksyon, mao nga wala na kinahanglana ang mga sample ballot tungod kay ang tanang ngalan sa mga kandidato anaa na sa balota, ug igo na lang kang magpili, ug dili na kinahanglan isuwat ang mga ngalan. 

Unya, morag dili na mosalir ang vote buying, tungod kay dili na man mahimo ang pag-kontra sinyas kay dili na man mahibaw-an kun kinsa ang imong botohan. Sa ato pa, pinaagi sa automation, ma-apply na ang giingon nga ”kan-a ang paon, iluwa ang taga,” ug dili ka masakpan.

Ug bahin sa konsiyensiya, dili kini mahisupak sa atong katarong ug kaligdong, tungod kay una sa tanan, ang salapi, for all we know, ato ra sad na, igo lang giuli nganhi kanato.

Ang dakung leksyon sa miaging eleksyon mao nga imposible na kaayo ang panikas. Sa ato pa, lisud na i-apply ang dagdag bawas, ang mga ballot box switching, ug pagmaniubra sa mga balota ug mga election returns .

Ato sang nakita sa miaging eleksyon ang kasibot sa katawhan pagbotar. Daku kaayo ang turnout, despite sa inconvenience nga nahimo gumikan sa kakulang sa sistima pagpadali pagsulod ngadto sa mga voting precincts.

Laing leksyon sa miaging eleksyon mao nga wa na kinahanglana ang daghan kaayong election materials ug paraphernalia, aron mudaog. Kini tungod kay ang katawhan well-informed na, gumikan sa ka-moderno na sa mga kahimanan sa media.

Mao man gani hinungdan nga bisan sa pag-dominar ni Senador Villar sa mga TV commercial ug sa ubang mga propaganda materials, wala kini mo-epekto sa desisyon sa mga pumipili.