Fight g'yud mayor ha?

Nagpaabot ko nga si Cebu City mayor-elect Michael Rama mohimo og paglahugay sa iyang mga department head ug tangtangon kadtong mga walay tarung trabaho aron nga molambo ang serbisyo ubos sa iyang administrasyon. Naay daghan diha nga walay klaro.

Anhi nato mamatud-an kun ang bag-o nato nga mayor dinhi sa dakbayan duna na ba’y kaisog sa paghimo og kausaban. Kinahanglan unta nga ayohon pagtan-aw ni Rama kun kinsa sa iyang mga kawani ang walay klarong trabaho.

Unya, angay’ng tan-awon usab ni Rama nganong ang usa ka consultant sa City Hall nga si Gerry Marquez kanunay mang uban-ubanan og pito ka kawani nga daw iya na lang bodyguards.

Kun si Rama estrikto lang g’yud nga mopatuman sa angay’ng himoon, tan-aw nako dili maglagyo ang iyang administrasyon unya sa administrasyon ni Mayor Tomas Osmeña kay usa god siya ka abogado.

Maayong tan-awon ni Rama kun napuslan ba ang tanang kawani sa City Hall alang sa serbisyo publiko.

Kami god nga mga City Hall reporters, nakabantay nga pito ka kawani sa City Hall daw sa gihimo ra man nga bodyguard ni Marquez nga kanunay’ng mag-ikog-ikog kun asa siya mopaingon.

Gitan-aw namo nga mga reporters ang accomplishments ni Marquez nga isumiter niya sa konseho panahon nga magpa-renew siya sa iyang appointment pagka consultant, wala may dagkong operasyon nga ilang gihimo.

Mga sakop kini sa Squatters Prevention Encroachment Elimination Division (SPEED) ang mga kawani nga kanunay’ng mag-ikog-ikog ni Marquez. Kini maoy rason nga si SPEED chief Vicente Mercado moreklamo nga wala na siya’y tawo.

Ambot madutlan ba kaha ni Rama kini si Marquez nga emcee man kini si Marquez sa iyang political campaign. Tungod sa paghisgot nako niining maong isyu, ang mga sakop ni Marquez dili na motagad nako kun akong ikahinagbo sa City Hall.

Usa kanila mitug-an nga dili na lang sila makig-estorya kay kasuk-an silang Marquez kun makit-an nga motagad nako. Wala may problema nga distinohan og mga sakop si Marquez, apan kinahanglang duna sila’y accomplishment.

Accomplishments nga maka-justify sa pagdistino kang Marquez ug pito ka kawani nga gisweldohan sa buhis sa katawhan. Lisud man kun ang katawhan ang magsweldo sa maong mga kawani unya himoon ra sila nga mora’g bodyguard. Sabtan ba nimo Mr. Marquez?

Ang bugtong ra g’yod nako nga tumong paghisgut niini aron molambo g’yod ang atong dakbayan ug dili kay sawayon ra ang kagamhanan ni Rama sa oposisyon.

* * *

Nindot kaayo nga si kanhi Cebu City Councilor Hilario Davide III, kinsa napilde sa paglansar niya pagka gobernador, itudlo nga Secretary sa Department of Justice (DOJ) human sa usa ka tuig nga ban alang sa mga pildero nga kandidato.

Haum kaayo si Davide nga mohupot sa maong pwesto. Husto si Mayor Tomas Osmeña sa iyang pagtoo nga human sa usa ka tuig nga ban, si Davide itudlo gayod og national posisyon kay kaalyansa god sila ni Senador Noynoy Aquino.

Kun si Davide maoy mag-DOJ Secretary, dili na kita makaduda sa mga opinion sa maong ahensya kay tarung kaayo si Davide. Anugon lagi kaayo nga dili siya ang midaug pagka gobernador.