Ang huling travel ko’y nagpuntang Canada
pamilya ni Boyet ang aking kasama;
Yao’y kanyang misis, dalwang anak niya
kaya lima kaming nagbyaheng masaya!
Nag-ayos ng travel anak kong panganay –
doon nakatira at naghahanapbuhay;
Halos taun-taon kami’y naglalakbay
hali-halili lang at kung walang aral!
Ng aming masapit malayong Vancouver
Ay limang oras pa na muling nag-travel;
Sa Toronto City kami ay nag-hotel
saka ipinasyal sa mga tanawin!
Doon sa Toronto ay aming nakita –
dalwang World Wonders na napakaganda;
Una’y CN Tower na kay taas pala –
at doo’y namasdan ang buong Canada!
Sumunod na doo’y aming pinasyalan –
ay ang Niagara Falls na kay gandang tunay;
Nang ang likod nito’y aming pinuntahan –
kay lakas ng patak – tubig-kalikasan!
Tatlong araw kaming doo’y namalagi
sa bus at sky train nagbibiyahe lagi;
Malalayong lakbay papunta’t pauwi -–
sa bintana’y tanaw bundok at gusali!
At nang sa Vancouver kami ay nagbalik
kami ay namasyal kahi’t na malamig;
Mga pamilihan ay aming sinaglit
hindi na namili sa taas ng prices!
Dalwang linggo kami na doo’y masaya –
sa condo ng anak na kay tayog pala;
Nasa 24th floor condo unit niya
di ko nanaising doon na tumira!
Kaya nang pauwi’y masigla na ako
sa mga nakitang s’yudad na moderno;
Doon ay malamig ang klima’y perwisyo –
dito sa Philippines ang klima’y mahal ko!