Hain na'ng kritiko sa PCOS?

Kun unsa ang kasabaan sa mga kritiko sa paggamit sa Precinct Count Optical Scan kon PCOS machine niadtong nagsing-abot pa ang piniliay ingon sab niini sila ka mingaw sa pagkakaron human sila namatud-ang sayop sa ilang pagdaot ug pagsaway sa Commission on Elections kaniadto.

Ang mga pundok nga kaniadto nanawagan sa Comelec pagsalikway sa poll automation ug mobalik sa kinaraang paagi sa manu-mano pag-ihap sa mga balota wala na gyud motig-ik.

Bisan pag-angkon nga sila nasayop sa ilang sayong paghusgar sa PCOS machine ug sa Comelec wala gyud nila himoa. Akong hagit alang sa mga grupo nga sayong mihusgar sa Comelec nga dili makahimo sa pagpahigayon sa poll automation, tingog ug pagbaton og kaisog pag-angkon sa inyong sayop.

Mas makatarunganon ug desente alang ninyo og mangayo pud mo og pasaylo ngadto sa mga opisyal sa Comelec nga kuwang nalang ninyo balikason kaniadto diha sa inyong pagpangugat nga dili gyud mamahimong gamiton ang PCOS tungod kay moresulta lang kini og failure of election.

Hain naman ang grupo nila ni Atty. Democrito Barcenas sa Noy-Mar Volunteer Group dinhi sa Sugbo? Hain naman ang inyong gipasiatab nga dili andam ang Comelec paghimo sa poll automation?

Sukwahi sa inyong gituohan, kaluoy sa Ginoo malampuson ang pagpahigayon sa unang poll automation sa atong piniliay. Kun duna may mga dapit nga gideklarar sa Comelec dinhi sa nasud nga failure of election dili ni tungod sa PCOS kun dili sa mga kagubot nga mitumaw.

Sa akong personal nga kasinatian isip botante, mas sayon ang pagboto ug mas paspas ang resulta. Kun manu-mano pa ang atong paagi sa ihap, siguro hangtud karon wala pay naproklamar nga mga opisyal sa lalawigan ug bisan dinhi sa dakbayan sa Sugbo.

Wala pa sab siguro ta masayod hangtud ron og kinsay sunod nga presidente sa nasud. Bisan tuod wa pay pormal nga proklamasyon apan ang tanan sayod na nga si Senador Benigno “Noynoy” Aquino III maoy sunod nga presidente pinaagi sa poll automation.

Alang nako angayan natong daygon ug pasalamatan ang Comelec nga bisan sa mga kakulian sa pagpangandam ug sa kalangan sa preparasyon apan nahimo nila ang ilang tahas nga mapahigayon nga hapsay ug malinawon ang kinatibuk-an sa atong eleksiyon.

Bisan kun daghan ang nagbagulbol sa kahasol ug kalangan sa pagbotar apan angayan nato nga sabton nga bag-o ang sistema nga atong gigamit busa atong hatagan og higayon ang Comelec nga mohimo sa gikinahanglang mga adjustment.

Siguro pinaagi sa atong kasinatian karong tuiga makakat-on ang Comelec ug ilang mapangitaan og paagi nga dili na masubli ang maong sitwasyon sunod eleksiyon.

* * *

[email protected]