EDITORYAL - Eleksyon ipadayon gyud

Walay butang nga ginama sa tawo nga perpekto sa iyang kalig-on ug kadurante kay bisan ang kalibotan nga binuhat sa Labaw’ng Makagagahum may katapusan man.

Kun may mga makina sa PCOS nga naabiriya sa dihang gisuwayan kini nila didto sa kaulohan, dili usab buot ipasabot nga ang gitakdang eleksyon sa Lunes dili ipadayon.

Ang mga lider sa kagamhanan ug ang nagpabrika sa maong mga PCOS dili mga borukento ug putong og hunahuna, sama sa kahiktin sa panghunahuna sa pipila ka politiko.

Kay nasayod ang naggama sa maong mga kahimanan unsay mga daling lakang nga angayang buhaton aron bisan unsay mahitabo, ang piniliay sa Mayo 10, 2010 nga dugay nang gilatid sa Batakang Balaod makabaton og katumanan.