Sa akong pagpauli didto sa lalawigan sa Bohol kaniadtong Domingo akong nahimamat sa barko ang akong higala nga dugay ko nang wa makita. Usa siya ka magtutudlo sa kolehiyo dinhi sa Sugbo ug sa among pagkukabildo akong nasayran nga die hard kaayo siya ngadto sa iyang piliong pangulo. Di ko lang ibutyag ang iyang pangalan agi og pagtamod sa ka sekreto ug pagka sagrado sa iyang boto.
Sa among paghimamatay iyang gitug-an nga sekreto siyang nangampanya ngadto sa iyang mga tinun-an ug mga higala kay dili siya gusto nga mahibaw-an ang iyang pangalan kay basin unya kuno og tudloon siya sa iyang paboritong kandidato inig daug niini nga maoy sunod nga sekretaryo sa departamento sa edukasyon o ba kaha chairman sa Commission on Higher Education sa iya pang komedya.
Bisa’g unsaon ug bisan motuwad pa kuno ang kalibutan Noynoy Aquino gyod siya. Nga bisan pag paliton og usa ka milyon ni Manny Villar ang iyang boto di na gyod kuno kini malubag pa Noynoy Aquino pa rin siya.
Sa dihang akong gihagit ug gisingitan sa mga isyu nga gibato ngadto sa iyang paboritong kandidato dali ra kaayo si sir nga misalindot niini tungod kay sayod siya nga natural lang gyod kuno kini sa politika.
Si Sir gusto nga mamahimong sunod nga pangulo sa nasud si Noynoy Aquino tungod sa iyang mga ginikanan nga sila si Ninoy ug Cory. Sa siyam ka mga kandidato ang pamilyang Aquino lamang kuno ang adunay dako nga natampo sa nasud. Sukad pa sa iyang Lolo nga si Benigno Aquino Sr., amahan nga si Ninoy ug inahan nga si Cory dugay na kunong nagsilbi sa nasud ang mga Aquino ug kalooy sa Ginoo pulos kaayohan sa nasud ang ilang nahimo.
Si Dr. Jose P. Laurel kauban ni Benigno Aquino Sr. misugot nga moserbisyo isip presidente ug bise presidente panahon sa mga hapon aron mahunong na ang sinalbahis nga gihimo niini ngadto sa atong mga katiguwangan. Si Benigno Jr. o Ninoy miula sa iyang dugo aron makalingkawas ang katawhang pinoy sa diktadoryang kagamhanan ni Marcos samtang gipabalik ug gipalig-on ni Cory Aquino ang demokrasya sa nasud. Wa pa kuno kini labot sa mga nahimo ni Noynoy isip kongresista ug senador sa nasud. Bitaw sa?
* * *
Mikabat na diay ngadto sa 2.8 bilyones ka pesos ang nagahin sa konseho sa dakbayan sa Mandaue alang sa operasyon sa ilang kagamhanan apan ang ilang mga kanal wa gihapon maatiman, ang ilang mga basura gipanglagong ug nagpasad gihapon sa kadalanan, ang ilang ihawan ug bag-ong merkado wa gihapon mahuman ug nangasakit ang ilang katawhan. Asa man diay mopaingon ang maong gidak-on sa salapi nga gigahin para sa iyang kagamhanan?
Ang ikaduhang taytayan nga nagdugtong sa Mandaue ug Lapu-lapu gitukod sa kantidad nga 2.5 bilyones ka pesos lamang mas gamay kini kun itandi sa tulo ka tuig nga gahin sa dakbayan sa Mandaue alang sa operasyon sa iyang kagamhanan busa kun gigahinan pa unta sa maong kantidad ang infrastructure project hayan dugay ra untang naalibyohan ang mga suliran nga ato nang nahisgutan ug dugay ra usab untang nahuman ang mga proyekto nga nagpangamay na ni Mayor Jonas Cortes aron iyang duolon ug atimanon.
Kun giayo pa lamang unta sa paggasto ang 2.8 bilyones ka pesos nga gahin sa ilang kagamhanan wa na seguro untay magbagutbot sa liderato ni Mayor Jonas Cortes.