Sama sa gipaabot nang daan ang Commission on Elections mibasura sa mga sugyot alang sa parallel manual counting sa eleksiyon karong Mayo 10. Ang Comelec nagkanayon nga ang paghimo og manual count mag-abli ni sa kahigayonan alang sa posibling “dagdag-bawas” sama sa karaang reklamo sa tikas sa nangagi nga mga eleksiyon.
Matud sa Comelec nga wala sab itugot sa balaod ang paghimo og parallel manual counting. Ang tigpamaba sa Comelec nga si James Jimenez miingon nga ang gitugot sa balaod mao lang ang random manual audit.
Basi sa maong probiso ang Comelec mohimo og manual count sa usa ka presinto sulod sa usa ka distrito aron pagsusi sa accuracy sa Precinct Count Optican Scan kon PCOS machines.
Ang Makati Business Club ingon man ang pipila ka mga miyembro sa Philippine Bar Association ang miduso nga dunay parallel manual counting nga himuon. Ang maong sugyot nakakuha sab og suporta sa mga dumadapig ni Senador Noynoy Aquino.
Ang ilang argumento mao nga wa silay salig sa preparasyon sa Comelec alang sa poll automation hinungdan nga buot nila nga dunay manual counting. Ambot og giunsa pagpinsar sa mga nagpaluyo sa maong lakang ang ilang mga argumento.
Dili sab ko motoo nga giango-ango na ang maong mga tawo. Tingali nayabag nalang gyud ang ilang pinsada. Nganong nayabag? Tiaw mo bay niadtong manual ang paagi sa ihap sa atong eleksiyon kining mao nga mga tawo lakip sa mga miduso nga usbon ang sistema.
Pananglitan si Atty. Democrito Barcenas, ang usa sa mga convenors sa Noy-Mar volunteer group dinhi sa Sugbo, nahinumdom ko nga usa siya sa mga nanawagan kaniadto og kausaban sa sistema.
Unya karon nga computerized na ang ihap sa eleksiyon buot na sab siyang mobalik og manual. Dili ba hinanggaw ang maong sugyot? Dili lang ta mahulog nga kataw-anan kun dili labaw pa ta sa nabuang niini.
Ilang rason nga dili sila kasalig sa Comelec mao nga gusto sila nga duna gyuy manual count aron ilang makit-an gyud ang balota ug matandi ang resulta sa ihap. Kun pananglitan ato ning himoon dili ba kaha hinuon maghatag ni og kagubot labi pa kun dili magtakdo ang PCOS ug ang resulta sa manual count.
Dako ra ba ang purohan nga masayop ang tawo nga mag-ihap kay sa computer. Dili kaha maghaling ni og kagubot?
Nagduda na hinuon ko sa tinud-anay gyud nga motibo sa kampo sa Liberal Party tungod kay mura man og gusto nilang isabotahi ang eleksiyon. Nganong moinsister man sila nga dili andam ang Comelec alang sa poll automation, unsa may ilang kasayuran sa pagpangandam sa Comelec?
Makita ang motibo sa Liberal Party labi pa sa mga pamahayag sa ilang kandidato nga kun mapildi kuno siya klarong dunay tikas nga nahitabo. Usa ka dakong iresponsabli nga pamahayag ug alang nako nag-awhag sa katawhan nga magrebeldi sa gobyerno.
Tiaw mo nga gikondisyon na daan ang publiko wala pa gani ang eleksiyon nga siya nay mananaog.
* * *