Si Bise Mayor Michael Rama nga kandidato pagka-mayor sa Bando Osmeña Pundok Kauswagan sa dakbayan sa Sugbo sa miaging adlaw pormal nga mipasaka og kasong libelo batok ni Philip Jimboy Tiongko, ang executive director sa Krusada Batok sa Druga.
Kini human miakusar si Tiongko kang Rama nga suportado sa usa ka druglord ug usa ka public enemy number one.
Ang pagkampanya batok sa usa ka tawo wala idili sa balaod. Apan aduna kini limitasyon, usa niini mao nga dili kini makalapas sa tawhanong katungod ug dili makadaot sa pagkatawo sa usa ka kandidato.
Seryoso ang alegasyon ni Tiongko, busa angay niya kining pamatud-an. Apan adunay giingon sa balaod sa libelo nga “truth is not a defense” ug kun adunay kamatuoran ang kalambigitan ni Rama kang Tata Negro, dili kini angay ipanabi sa publiko.
Apan nasabwag naman ang tanan sa publiko, usa lamang ka butang ang angayang mabuhat ni Rama.
Ug mao kini ang pagdepensa sa iyang katungod pinaagi sa pagpalaban sa korte.