Bag-ong balota

Mas maayo gihapon nga modagkot og kandila. Kay sa pagtunglo sa kangitngit. Mao ni angay’ng hinumdoman sa nagpakabana nga mga sektor sa katilingban nga nagsige og pasidaan nga tikason ang umaabot nga piniliay. Nga ang labing unang nasudnong automated nga piniliay mosabotahe sa kabubut-on sa katawhan ug mosangpot sa lapad nga kaguliyang.

Kun hangtod karon nagduda sila sa automation, uwahi nang tanan. Kaniadto pa untang nikisikisi dihang gituki pa sa Kongreso ang balaod sa automation. Kaniadto unta sa wa pa masubasta ang P7.2 bilyones nga kontrata nga nadaog sa Smartmatic. Kaniadto unta nga duna pay igong panahon ang Comelec sa pagpangandam sa hingpit nga manumano nga piniliay.

* * *

Laing nagpuyo pa sa langob hangtod karon mao si Cebu City Vice Mayor Michael Rama. Kinsa nipasidaan nga di pa andam ang mga botante sa 28 ka pulgada nga balota nga gamiton sa umaabot nga piniliay. Nabalaka si Rama nga ang mga botante nga ubos og edukasyon ug hamtong nag pangedaron maglisod sa pagbotar ginamit ang bag-ong balota.

May balita kong Rama. Ang mga botante mas utokan pa niya. Sa nasudnong survey sa Social Weather Stations (SWS) sa miaging tuig, nakaplagan nga dul-an sa 90% sa mga botante andam na ug mas sayonan pa gani sa pag-shade, inay pagsuwat, sa mga ngan sa mga kandidato nga ilang mapilian.

* * *

Gitumbok sa mga napangutana sa SWS ang pasulit nga ilang nakuha sa mga tinun-an pa sila ug sa mga transaksiyon sa mga bangko ug ubang mga buhatan karong dagko na sila. Apil sa ilang gitumbok nga nakapaandam nila sa bag-ong balota mao ang, ug nahadlok kong nataligam-an lang ning Rama, National College Entrance Examination (NCEE).

Karong gisugdan na sa Comelec ang pag-apud-apod sa Voter Information Sheets, nga gipatik nila isip tinuod gyod nga sample ballots, mapamatud-an sa mga botante nga way sukaranan ang kahadlok sa mga politiko samang Rama. Mas maayo pa nga inay manghadlok gamiton ni Rama ang makinarya sa BOPK pagtabang pag-edukar sa mga botante.

* * *

Ambot moinsistir ba gihapon si Rama nga mas lisod ang pag-shade kay wa pagsuwat sa iyang ngan sa balota. Katabangan niyang mga botante kun mas ipabansiwag sa iyang campaign materials ang iyang apelyido (“Rama”) kay sa iyang angga (“Mike”) ug pahinumdoman sila nga “8” ang iyang numero, gitaliwad-an nilang “Osmeña, John Henry Renner Sonny” ug “Saavedra, Crisologo Vazquez Cris.”

Mas maayo tingaling, inay initan ang bag-ong balota, papahuwayon sa hingpit ni Rama ang mga pasangil nga naglambigit niya sa gidudahang durugista sa Sugbo. Way motuo sa gibanhaw’ng pasangil nga gipaukyab sa iyang mga kaatbang. Apan iyang obligasyon ang pagpatin-aw sa mga Sugbuanon, di lang nilang Mayor Tomas Osmeña ug mga konsehal atol sa tinak-opang tigom.

* * *

Email:[email protected]m