Mama ni Villar

Naluoy ko nga nagtan-aw sa inahan ni Sen. Manny Villar nga mihilak atubangan sa kamera sa dihang gi-interbiyu sa mga sakop sa media sa iyang panimalay.

Wala makapugong ang inahan ni Villar sa pagtulo sa iyang mga luha aron depensahan ang iyang pinalanggang anak nga nabulit sa mga pagpangdaot sa mga matud pa kaatbang niini.

Wala si Villar sa ilang panimalay sa dihang gihinabi sa mga sakop sa media ang inahan ni Villar.

Apan didto ang iyang mga igsuon nga sama sa ilang inahan, maisugon usab nga mibasol sa mga sakop sa media nga matud nila “unfair” kaayo sa ilang igsuon.

Ang usa ka igsuong babaye ni Villar wala usab makapugong sa kaugalingon sa dihang iyang gipanghinganlan ang mga sakop sa media nga hilabihan kakritikal sa presidential bet sa Nacionalista party.

Mismo si Villar miangkon nga naapektahan kaayo ang iyang popularity rating sa mga pagpangdaot nga gilabay ngadto kaniya karon nga nag-inangat na ang eleksiyon sa Mayo 10.

Sa bag-ong survey result sa BusinessWorld-Social Weather Station, ang rating ni Sen. Noynoy Aquino sa Liberal party misaka gikan sa 37 porsiyento ngadto sa 38 porsiyento, samtang si Villar gikan sa 29 porsiyento nanaog og dos puntos ngadto sa 26 porsiyento. Nagsunod nila si Joseph Estrada nga nanaog usab og dos puntos ang rating ngadto sa 19 porsiyento.

Duol na kaayo ang eleksiyon, busa dili matukib ang gibating kabalaka ni Villar nga basin maglisod na siya pagbawi sa rating.

Gibasol ni Villar ang black propaganda nga gibato ngadto kaniya nga matud niya nakadaot pag-ayo sa iyang mga diskarte isip presidentiable. Apan nasayod ko nga ang kampo ni Villar walay kinatulogay karon aron i-restructure ang campaign strategy.

Ang kampo ni Noynoy makausa mitiyabaw usab tungod sa paggawas sa giingong dokumento gikan sa Ateneo de Manila nga nagsaysay sa pagpa-ilawom ni Noynoy og psychiatric test, butang nga daling gihimakak sa standard bearer sa Liberal.

Karon nga pila na lang ka adlaw sa dili pa ang eleksiyon, maklaro na nato nga ang ‘fight’ sa pagka-presidente tali na lang nilang Noynoy ug Villar.

Sa pagka-bise presidente, si Mar Roxas gihapon ang nag-una human makakuha og taas nga rating nga 39 porsiyento.

Ang nakaparat, imbes si Sen. Loren Legarda na unta ang nagsunod ni Roxas, naapsan siya ni Mayor Jejomar Binay og usa ka puntos tungod sa nakuha niyang rating nga 25 porsiyento ug 24 lang kang Legarda.

* * *

Dako og ikatabang ang pag-endorso ni Mrs. Thelma Chiong, ang bise presidente sa Crusade Against Violence, sa kandidatura ni Rico Palcuto, independenteng kandidato pagka-bise mayor sa dakbayan sa Sugbo.

Sa press conference kagahapon, giklaro ni Chiong nga ang pag-endorso sa CAV kang Palcuto tungod kini sa nakita nila nga si Palcuto lamang ang bugtong kandidato nga adunay programa alang sa kahusay ug kalinaw.

Nagtuo si Chiong nga kun ang usa ka lider sama ni Palcuto nga adunay programa sa peace and order, nindot ang dagan sa lokal nga kagamhanan, ilabi na nga si Palcuto adunay kasinatian sa pagpatunhay sa kahusay ug kalinaw isip kanhi hepe sa kapolisan dili lang dinhi sa Sugbo kun dili sa ubang lugar.

Si Palcuto sa iyang bahin nagkanayon nga ang kriminalidad nagsugod sa kalisud. Busa ang kalisud sa mga lumolupyo angay hatagan og pagtagad kay kun masulbad kini, wala nay kriminalidad. Kun minus o wala nay kriminalidad, modaghan ang mobubo og puhonan ug kun daghang negosyante ang mag-negosyo, daghan ang makatrabaho ug molambo ang ekonomiya.

Sa tanang kandidato sa siyudad, si Palcuto pa ang akong nadunggan nga nakasulti niini.

Dunay atong mga kandidato sa Bando Osmeña Pundok Kauswagan, wala gyuy pulong nga ingon niini. Samot na ang mga kandidato sa Kugi Uswag Sugbo hilabihan kahaw-ang kun manulti.

Sa mga rally, angay unta mapaminawan ang mga kandidato nga mohunat pagsabwag sa iyang mga laraw sa higayon mapili sa Mayo 10 nga eleksiyon.

Apan kining atong mga kandidato, ilabi na kanang anaa sa BOPK, nagsalig lang sa makinarya alang sa ilang kadaogan. Si Chiong sa press conference kagahapon nakaingon kun wala ang BOPK, unsa kahay mabuhat ni Joy Augustus Young sa iyang kandidatura.

Tingale mao usab si Rudy Cabrera, ang kandidato pagka-bise mayor sa KUSUG, tigulang na ug ambot unsa kahay mahimo niini sa konseho.

* * *

Naghisgot man kita og kampanya, naabot sa akong dunggan ang estilo ni Cutie del Mar sa iyang pagpangampanya.

Pagka-maayo man diay mokanta niining Cutie. Tingale, lupigon si Kapitan Mary delos Santos sa pagguwapahay ug kantahay kay sa akong nahibaw-an, artista man diay kini si Cutie sa Manila ug maayo na kini moatubang sa telebisyon.

Mao tingale kini ang nakalamang ni Cutie kang Mary Ann tungod kay maayo man siyang mo-entertain sa mga tawo.

Apan mag-unsa man ang maayong mokanta kun dili makamaong makighugoyhugoy si Cutie sa mga tawo, molikay sa mga forum ug interview sa media kay dili diay kamao mang-estorya ug dili makamao mopasabot sa iyang mga plano simbako og mapili sa Mayo 10.

Migawas gihapon ang pagka-papa’s girl ni Cutie, ganahan kaayo siyang pirme anaa sa iyang kiliran ang iyang amahan.

Pastilan, kun mao kini ang sitwasyon, dili man mahimo ang “buy-one take-one” sa Kongreso. Kinahanglan, usa lamang kanila ang molingkod simbako lagi og mapili si Cutie. Dili man mahimong pirme lang mag-uban-uban ang iyang amahan nga si Kongresista Raul del Mar didto sa Kongreso.

Dili usab mahimong si Kongresista Raul del Mar ang makig-debate sa hawanan sa Kamara kun si Cutie ang mapili sa Mayo 10.

Timan-i, bawal ang magsabak-sabak sa Kongreso. Bisan amahan pa og anak!