Gikulbaan na sila'g maayo!

Sa ako nang giingon dinhi, maayo ra gyud nga wa ko molansar, kay apil unta ko’s gipangulbaan karon. Kaha, ang ubang mga kandidato, nga sa ilang paniid di gyud kadaug, nagmahay nganong nagpahinayak paglansar. Apan, wa pa may mi-withdraw sa ilang candidacy pagkakaron. Nagtuo sila nga mudaog silang tanan?

Pulos na black propaganda ang atong madungog sa kahanginan. Hugaw na gyud kaayo ang mga lapok nga gipanglabay. Sa atong pagpaminaw, daw walay but-an nilang tanan, apan, on the other hand, pulos sad sila mga buotan.

Ang uban, makapanimaho na tingali sa kapildihon, mo-resort sa pagpangiha. Kiha dinhi, kiha didto. Mao kini ang politika sa atong nasud. Hilabihang hugawa. Ambut ngano.

Ang politika, per se, di man dautan. Politics, matud pa sa diksyonaryo: is an art and science of administration of government; political affairs of life. Hai may ngil-ad diha? Ambut nganong gi-ngil-ad man ni sa atong mga politiko? Hangtud hinuon, hadlok na lang tang molansar.

Apan, ang pulong politician, adunay mga kahulogan o synonyms nga mohaom sa kinaiya sa atong mga politiko. Ania: baby-kisser, boss, chieftain, grandstander, orator. Mao diay hinungdan nga kusog kaayo ni sila manghawok ug mga bata – bisa’g way mga kaligo (panahon sa eleksyon), ug inigdaug, grandstanding dayon, ilabina’g covered sa media.

Ang pulong politician, wala magkahulogan og balimbing o dynasty. Sa ato pa, ato ra ni dinhi. Mora ta’g ubos sa mga hari ug rayna, diin, ang mosunod pagpangagamhanan mao ang mga anak. Dinhi sa ato, magdungan gyud og gunit sa gahom ang mga sakop sa banay. Ug tungod kay English dictionary man ning atong gitamdan, lagmit wala sa America ang turncoatism, ug kining paghimong usa ka family affair o family property ang pagpangatungdanang publiko sa mga elective positions.

Anyway, kabahin na kini sa atong kultura ug sa atong electoral system. Wa na tay mahimo niini. Kun kinsa man unya ang mogulang mananaug, ambut kun aduna ba silay igong kaisog paghimo’g kausaban sa atong electoral processes.

In the meantime, di kalikayan nga bation gyud ta’g kakulba, ilabi ang mga kandidato mismo, ang mga sakop sa banay ug mga diehard supporters.