Bokasyon batok propesyon

Abril 25, 2010: Ika-Upat nga Domingo sa Pasko sa Pagkabanhaw

(Domingo sa Maayong Magbalantay)

Mga Pagbasa: Buh. 13;14,43-52/Gip. 7;9,14-17/Jn. 10;27-3

Niadtong seminarista pa ako, gidamgo ko nga unta mamahimo akong maayo ug buotang pari. Daghang mga butang ang akong gimithi nga pagahimoon.

Daghang kaayohan ang angayang pagabuhaton. Ning pari na ako, nakita ko nga wala pa gyud bisan gamay na lang sa akong gimithi ang akong nahimo.

Kay imbis nagiyahan, adunay mga higayon nga gibati ko ang tumang kalibog ug gipamalandongan pag-usab ang nabahaw'ng adlaw sa ordinasyon. Kini tungod kay padayon gihapong gituki kun sa kinabuhi ang pagkapari nahimo bang bokasyon o nahimo naman lang ba hinuong propesyon. Ako kining gipaambit karong Domingoha kay karon man Domingo sa Maayong Magbalantay nga mao usab ang Kalibutanong Adlaw sa Pag-ampo alang sa Bokasyon.

Kini ang gipangindahay ni San Hanibal Maria di Francia nga unta mas daghan pa untang mga mosunod sa tunob sa Maayong Magbalantay ug nga kini silang mga pinili mamahimong sama unta sa iyang kasingkasing: Malumo, Maluloy-on, Matinud-anon ug Maaghop.Apan lagi kay tawo lamang nahimong nasayop. Hinuon dunay nakaamgo ug nagbag-o apan dunay uban nga nagpakabuta-bungol lamang. Kay alang sa uban wala nay kalainan ang pagkapari sa uban pang panginabuhian.

Dunay mga higayon nga wali uga ug walay kahulogan mismo sa kaugalingong kinabuhi sa nagwali niini. Apan kay buhat man angay lamang nga tumanon, himoon bisan bakikaw.

Sa akong pagtagik ning maong pamalandong dili nako makalimtan ang mga pahimangno sa Ginoo nga mamahimong ubos aron mahimong tinuod nga alagad.

Apan dili ikalimod usab nga mahulagway ko si Amaro nga nagminaro agi’g pagtak-op sa iyang krimen. Pastilan kalisud! Kun dili pa lang sala ang magpakapon..... Apan unsa may ikahalad sa Ginoo kun dili ako maantigong mosakripisyo?