200 milyones maoy bugti?

Wala nay makatupong sa ka inutil ug kalampingasan sa Department of Justice dihang gibasura niini ang mga kasong murder batok sa suspendidong gobernador sa Autonomous Region in Muslim Mindanao nga si Zaldy Ampatuan ug sa ig-agaw niini nga si Akmad Ampatuan.

Si Acting Justice Secretary Alberto Agra mimando nga buhian ang duha ka mga miyembro sa banay’ng Ampatuan diin lakip sa mga gitumbok nga responsabli sa pagpatay sa 57 ka mga tawo lakip na sa kapin sa 30 ka mga sakop sa media didto sa Maguindanao.

Kamanduan ni Agra pagbuhi sa duha ka mga Ampatuan nunot sa iyang pagbasura sa mga kasong murder batok nila. Gibaliktad ni Agra ang finding sa panel of prosecutors nga mipahigayon sa preliminary investigation sa kaso tungod kay matud niya wala kunoy ebidensiya bisan sa pagtumbok sa mga saksi kanila.

Mas gihatagan og gibug-aton ni Agra ang pangangkon sa duha nga wala silay labot sa hitabo tungod kay wala sila didto sa dapit diin mahitabo ang krimin. Ang rason ni Agra pagbasura sa kaso batok sa duha ka mga Ampatuan dili madawat bisan sa iyang kaugalingong mga sakop.

Kini maoy hinungdan nga ang chief state prosecutor sa DOJ nga si Claro Arellano maoy nangulo sa protesta batok sa desisyon ni Agra. Si Arellano kusganong misaway ni Agra tungod kay bisan wala makatungtong sa tunghaan sa abogasya makasabot nga pinugos ug wa gyuy klarong gipasikaran ang desisyon ni Agra.

Alang nako dakong insulto sa DOJ ang gihimo ni Agra tungod kay gawas nga nagpakita ni sa iyang kaignorante mipasamot pa gyud sa pagkahanaw sa pagsalig sa publiko sa maong ahensiya sa gobyerno.

Ang pag-ingon ni Agra nga wala didto ang duha ka mga Ampatuan sa crime scene timailhan sa iyang ka bogo ug ka ignorante. Sa taas nga mga kutay sa disisyon sa Korte Suprema ang labaw’ng hukmanan misubli-subli nga ang alibi kon lanlis ug ang denial kon pagpanghimakak maoy labing huyang nga depensa.

Tungod kay wa igkita ang duha ka mga Ampatuan sa crime scene wala magpasabot nga wa na silay labot sa krimin. Nakalimot siya nga ang duha nakigkonsabo sa ubang miyembro sa ilang pamilya nga nagpabilin pang akusado hangtud karon.

Sa ato pa kun dunay conspiracy ang aksiyon sa usa ka akusado tulobagon sa tanan. Hinuon kun natabunan ang iyang mga mata sa 200 milyones nga giingong gibayad kaniya dili na gyud ta kapaabot og makiangayong hukom.

Ang akong tinubdan gikan sa kaulohan miingon nga ang balita didto sa DOJ mao nga 200 milyones ang gidawat ni Agra. Matud pa nga usa sa mga tumong pagbuhi sa duha ka mga miyembro sa banay’ng Ampatuan mao ang pagtabang sa kandidatura sa usa ka presidentiable.

* * *

[email protected]