Si kinsa ba nila ang imong pilion

Pila na lamang ka adlaw bugnong lugaynon na, hinaut nga nakahukom kana kun si kinsa sa siyam ka mga aplikante sa pagka presidente sa nasud ang imong dawaton. Akong gigamit ang termino nga aplikante kay kini ugong mga kandidato wa ni sila’y kalainan sa mga aplikante og trabaho ug kitang mga botante mao ang modawat sa ilang aplikasyon. 

Ug kay kita man ang modawat sa aplikasyon sa mga kandidato kinahanglan nga aduna gayod kitay mga basihanan. Karon nakahukom ka na ba?

Kun nakahukom ka na, unsa man kaha ang imong nahimong basihanan sa pagdawat sa mga aplikante? Gidawat ba nimo siya kay aduna siya’y pleasing personality? Gidawat ba nimo siya kay kuwalipikado sa posisyon o gidawat nimo siya gumikan kay gusto lang gyod nimo siya.

Kun ugaling wa ka pa kapili kun si kinsa sa siyam ka mga aplikante ang imong dawaton aron motrabaho isip presidente, aduna koy sugyot nga puyde nimong basihan sa imong pagpili o pagdawat sa mga aplikante sa pagka presidente sa atong nasud. Puyde kang mopili sa mga aplikante basi sa ilang integridad, kuwalipikasyon ug plata porma de gobyerno.

Ang nasud naglisod sa pagginhawa ug nag-antos sa tumang kalisod, nagkaproblema sa korupsyon ug nanginahanglan og kausaban. Giabuso usab ang atong kalikupan. Busa tan-awa kun asa sa mga plata porma de gobyerno nga gipresentar sa mga aplikante nga alang kanimo haum ug epektibo nga sulbad sa suliran sa nasud.

Tan-awa si kinsa sa mga aplikante sa pagka presidente ang mopaginhawa kanato ug motapos sa atong kalisod. Si kinsa kanila ang mowagtang sa korupsyon, makahatag og kausaban ug makapanalipod sa giabuso natong kalikupan.

Kun si kinsa kanila ang pinakamaayo alang kanimo, ikaw na ang bahala, basta hinumdomi nga ang ugma sa nasud nakasandig karon sa nag-inusara nimong boto. Iboto ang kaayohan sa nasud.