Bayente otso na lang ka adlaw, eleksiyon na.
Samtang nagkaduol ang eleksiyon, nagdako ang kabalaka nga mahitabo ang failure of election nunot sa paghangop sa Pilipinas sa labing unang computerized election.Nagkadaiyang sektor sa katilingban ang mibarog ug mipadayag sa mga kabalaka nga ang mga Precinct Count Optical Scan (PCOS) machine dili garantisadong malikay sa pagpanikas, inay makahatag kini og mas sayon, mas paspas ug mas modernong pagpanikas.
Ang atong mga awtoridad nagtuo nga kun 30 porsiyento sa tanang mga PCOS machine nga i-apud-apod sa mga tunghaan duha ka adlaw sa dili pa ang Mayo 10 dili mo-function o madaot, magdulot kini og failure of election sa nasud.
Tinuod nga kahadlokan ang pakyas nga piniliay. Maghatag kini og kagubot sa nasud, matud pa.
Apan ang maong klaseng kahadlok dili angay ipagamot sa atong mga hunahuna. Hinunoa, himoa kining positibong basehan nga makahimo na kita og modernong eleksiyon.
Ipadaplin ang mga kabalaka aron sa adlaw sa eleksiyon, mobarug kita ug manggawas aron mobotar sa mga kandidato nga gipili sa atong konsensiya. Kun magpatandog kita sa mga kabalaka, dili kini makatabang pagsulbad sa mga suliran sa atong gobyerno.