Tan-awa, dihang ang mga sakop sa Land Transportation Office (LTO) mihimo og kinalit nga operation batok sa mga kulorum nga sakyanang de pasaheroan kagahapon, daghan ang wala mobiyahe.
Wala sila mobiyahe, apil na ang mga daghang passenger jeepney driver kay nasayod man sila nga basta LTO agents na gani maoy mo-operate sigurado g’yod sila nga madakpan.
Unsaon nga pwerteng daghana na man sa mga sakyanan karon nga nagdagan-dagan nga kuwang og kahimanan. Gikan sa papeles ngadto na sa mga accessories.
Sa laktud, ang kahadlokan ra gyod sa mga drayber mao ra man ang mga LTO agents ug Highway guards kay ang mga traffic enforcers dili man moestrikto sa pagpanakop sa kalapasan sa Transportation and Traffic Code.
Luoy baya tinuod kun tinud-on g’yod ang pagpanakop sa mga drayber kay pwerteng dagkoa sa multahan kun ang basihan mao ang bag-ong memorandum circular sa LTO.
Apan kun dili god nato tinud-on sa pagpatuman ang balaud, daghan sa mga drayber ang moabuso. Human mabanggai ang akong sakyanan ug wala pa mahuman pag-ayo, nagmotor lang usa ko.
Kay kusug man ko manakop kaniadto og mga drayber sa motorsiklo nga dili magsul-ob og crash helmet, nagbantay g’yod ko.
Wala gayod mahitabo nga nag-drive ko sa akong motor nga wala magsul-ob og helmet. Sa laktud, wala g’yoy problema ang mga drayber kun motuman ra sa lagda.
Mas labing maayo g’yod tingali nga ibalik na ang paspas nga kampanya batok sa mga masalaypong drayber.
* * *
Maayong tagdon g’yod sa hingtungdang ahensya sa kagamhanan kadtong reklamo sa usa ka konsehal sa Oslob nga ang sakyanan sa ilang kapolisan gigamit kini sa pamolitika.
Ang reklamo sa maong konsehal nga mitawag sa sibyaanan DYAB kagahapon nagkanayon nga ang service vehicle usab sa ilang mayor gipapitlan og mga propaganda campaign posters sa kandidato.
Tinuod ba kini mayor? Nakakuha man kuno’g hulagway ang maong konsehal sa sakyanan sa mayor nga nabulit sa campaign posters. Wala kini itugot kun ang maong sakyanan iya sa kagamhanan.
Buyno, himoa kini og reklamo sa labing dali nga panahon. Ang mga reporter nga nadistino sa Kapitolyo angay’ng mohimo’g follow-up niining maong nindot nga isyu.
Diri hinoon sa dakbayan gidayeg nako ang mga reelectionist nga mga kandidato kay wala g’yod nila gamita ang sakyanan sa kagamhanan.
Apan nakabantay g’yod ko og mga kawani sa kagamhanan nga tingali nagpasipsip sa mga opisyal, kay pirmi nga mag-ikog-ikog. Ayaw usab ninyo pasubrahe uy. Hilas kaayo tan-awon.
Mao pay nakalapas mo sa balaud patuyangan pa g’yod ninyo ang paghinambog. Nakabantay man god ko kay mitambong man ko sa pulong-pulong sa mga kandidato sa Bando Osmeña Pundok-Kauswagan didto sa barangay Pasil niadtong miaging gabii.
Sayonan ka nga dihang namulong si Mayor Osmeña dunay kawani sa City Hall nga diha usab nagbarug sa iyang tupad. Dili man usab kini bodyguard sa mayor.
Kun kawani gani ka sa gobyerno, labi na nga mora’g permanent ka ra ba, ayaw kaayo padelantera kun motambong ka’g political campaign.
Ang pag-uban-uban nimo’s mayor sa pulong-pulong bisan dili ka bodyguard makadaut hinoon sa imong kandidato. Kadtong dili gayod makapugong, maayo tingali nga mo-leave lang mo sa trabaho.