Villaroyo o Aquinoroyo?

Sa atong pagsuwat niini, mga dagkung sinaligan ni Gloria, tua na sa kampo ni Noynoy. Ngano man? Nganong wa man sa kampo ni Villar? Nagpasabt ba kini nga dili diay tinuod nga si Villar manok ni Gloria?

Sa dihang nabaniog pag-ayo nga si Villar manok ni Gloria, mius-os ang rating ni Villar. Maoy hinungdan nga hilabihang panghimakak ni Villar nga siya manok ni Gloria, ilabina karong panahona, nga hilabihang pag-us-os sa acceptance rating ni Gloria. Apan, karong bag-o mga sinaligan ni Gloria mitapon na ngadto sa Liberal Party. Ngano man ni? Duha ray hinungdan niini: Una: lagmit, ilang nakita nga dumadaug si Noynoy, maoy hinungdan nga naniguro sila pagbalitok ngadto sa dumadaug nga Noynoy. Ikaduha: lagmit gipahimutang daan ni Gloria ang iyang mga tawo, aron adunay manalipod kaniya sa higayon nga molingkod na si Noynoy sa Malacañang.

Sa ato pa, tungod kaha kay nakita nila nga naglisud si Villar, gumikan sa C5 issue, ug ubang mga issue, ang mga sinaligan ni Gloria, nagpa-safety nang daan, aron mudaog sila uban ni Noynoy. 

Nagpasabot ba kini nga dili diay tinuod ang gibaniug nga Villaroyo – kondili, Aquinoroyo na ? Mao ba ni? Indeed, alegre kaayo ang politika sa atong nasud. Makalingaw.

Maoy atong ipahimangno sa mabuot nga mga lungsuranon nga dili magpadala sa mga panghitabo, sa mga pagbalibali sa atong mga lider, kondili maoy agdon ang diktar sa konsiyensiya, hikalimtan ang mga personal intereses, ug maoy ipatigbabaw ang intereses sa nasud.

Alang sa mga pumipili, timbangtimbanga pag-ayo ang mga isyu. Ayaw padala sa mga survey, ayaw padala sa mga pagbalitok-balitok sa mga lider. 

Duol na pag-ayo ang Mayo 10, daghan na kaayo ang black propaganda. Gani, hapit na tanang kasayoran, pulos black propaganda. Maglisud na tag pangita kinsa, unsa, ug hain ang tinuod.

Maoy hinungdan nga pipila sa atong kahigalaan, maghuwat na lang sa eleksyon, di na kaayo manginlabot sa kampanya, dili mo-serious pagdapig sa kandidato, aron bisag kinsa ang mudaog, dili kaayo sila sakitan kun mapilde ang ilang gibotohan.

Atong kahigalaan nangutana kinsa ang akong kandidato pagka-Presidente. Akong tubag: Wa pa mahibawo. Unya na didto sulod sa presinto, diin mohimo ko'g final consultation with my conscience.